MK Stalin | టీవీకే ఎమ్మెల్యే మ‌ర‌ణంతో కొల‌త్తూరులో ఉపఎన్నిక‌.. ఎంకే స్టాలిన్ పోటీ చేస్తారా..?

21 November 2026 - 16:30
0 0
MK Stalin | టీవీకే ఎమ్మెల్యే మ‌ర‌ణంతో కొల‌త్తూరులో ఉపఎన్నిక‌.. ఎంకే స్టాలిన్ పోటీ చేస్తారా..?
Mk Stalin

MK Stalin : టీవీకే ఎమ్మెల్యే (TVK MLA) వీఎస్ బాబు (VS Babu) మ‌ర‌ణంతో త‌మిళ‌నాడు (Tamil Nadu) లోని కొల‌త్తూరు (Kolathur) అసెంబ్లీ స్థానం ఖాళీ అయ్యింది. దాంతో ఆ స్థానానికి ఉప ఎన్నిక‌ల అనివార్య‌మైంది. గ‌త అసెంబ్లీ ఎన్నిక‌ల్లో ఆ స్థానంలో సీఎం హోదాలో ఉండి ఓడిపోయిన డీఎంకే చీఫ్ (DMK chief) ఎంకే స్టాలిన్ (MK Stalin) ఇప్పుడు ఉప ఎన్నిక‌ల్లో పోటీచేస్తారా.. లేదా..? అనేది చ‌ర్చ‌నీయాంశంగా మారింది. 2011 నుంచి ఆ అసెంబ్లీ స్థానానికి ప్రాతినిధ్యం వహిస్తున్న స్టాలిన్ గ‌త అసెంబ్లీ ఎన్నిక‌ల్లో అనూహ్య‌ ఓటమిని చవిచూశారు.

ఈ ఓటమి డీఎంకేకు అవమానకరంగా మారింది. మ‌రోవైపు న‌టుడు విజ‌య్ స్థాపించిన టీవీకే పార్టీ ఘ‌న విజ‌యం సాధించ‌డంతో రాష్ట్రంలో డీఎంకే అధికారాన్ని కూడా కోల్పోయింది. ఇప్పటికే డీఎంకేలో కొందరు నాయకులు స్టాలిన్ మళ్లీ కొలత్తూరు నుంచి పోటీ చేయాలని కోరుతున్నారు. డీఎంకే ఎంపీ సీ రవీంద్రన్ మాట్లాడుతూ.. ఈ నిర్ణయం పూర్తిగా స్టాలిన్‌దేనని అన్నారు. అయితే పార్టీ కార్యకర్తలు మాత్రం స్టాలిన్‌ మళ్లీ బరిలో దిగాలని ఆశిస్తున్నారని చెప్పారు.

ఇది త‌మ‌ నాయకుడి నియోజకవర్గమ‌ని, కాబట్టి నిర్ణయం తీసుకోవాల్సింది ఆయనేన‌ని ర‌వీంద్ర‌న్ అన్నారు. ఆయన పోటీచేస్తే తాము చాలా సంతోషిస్తామ‌ని చెప్పారు. అయితే తుది నిర్ణయం మాత్రం త‌మ‌ నాయకుడిదే అన్నారు. కాగా, గ‌త అసెంబ్లీ ఎన్నిక‌ల్లో స్టాలిన్ టీవీకే అభ్య‌ర్థి వీఎస్‌ బాబు చేతిలో 8,795 ఓట్ల తేడాతో ఓడిపోయారు. బాబుకు 82,997 ఓట్లు రాగా, స్టాలిన్‌కు 74,202 ఓట్లు వ‌చ్చాయి. బాబు తన రాజకీయ ప్రస్థానాన్ని డీఎంకేతో ప్రారంభించి, ఆ పార్టీలో వివిధ స్థాయిల్లో పనిచేశారు.

చెన్నై (నార్త్) జిల్లా కార్యదర్శి స్థాయికి ఎదిగారు. 2006లో పురసైవాక్కం నియోజకవర్గం నుంచి తమిళనాడు అసెంబ్లీకి ఎన్నికైన ఆయన 2011 వరకు ఆ నియోజకవర్గానికి ప్రాతినిధ్యం వహించారు. ఆ తర్వాత ఆయన అన్నాడీఎంకేలో చేరారు. అసెంబ్లీ ఎన్నికల ముందు టీవీకేలో చేరి ఆ పార్టీ తరపున కొలత్తూరు నియోజకవర్గం నుంచి పోటీచేసి గెలిచారు. ఇప్పుడు బాబు మ‌ర‌ణంతో అసెంబ్లీ స్థానం ఖాళీ అయ్యింది. ఇక్క‌డి నుంచి స్టాలిన్ మ‌ళ్లీ పోటీచేయ‌డం డీఎంకేకు కోల్పోయిన పట్టును తిరిగి పొందడానికి తోడ్ప‌డుతుంది.

మ‌రోవైపు నష్టభయాలను కూడా కలిగిస్తున్న‌ది. అక్క‌డి నుంచి స్టాలిన్ మ‌ళ్లీ ఓడిపోతే గ‌త ఎన్నిక‌ల్లో ఓటమి అవ‌మానం మ‌రింత తీవ్రమ‌య్యే ఛాన్స్ ఉంది. టీవీకేకు కూడా త‌న స్థానాన్ని తిరిగిపొంద‌డం ప్ర‌తిష్ఠాత్మ‌క‌మే అని చెప్ప‌వ‌చ్చు. ఎందుకంటే గ‌త‌ అసెంబ్లీ ఎన్నిక‌ల్లో గెలిపించిన ప్ర‌జ‌ల మ‌ద్ద‌తు అదేస్థాయిలో ఉందా.. త‌గ్గిందా అనే విష‌యాన్ని ప్ర‌శ్నించుకునే అవ‌కాశం ల‌భిస్తుంది.

Comments (0)

User