Varanasi | వారణాసి ఓటీటీ రైట్స్‌కు కళ్లు చెదిరే డీల్.. నెట్‌ఫ్లిక్స్ ఆఫర్ రూ.500 కోట్లా?

Varanasi | ఇప్పుడు భారతీయ సినీ ప్రేక్షకులు ఎంతో ఆసక్తిగా ఎదురుచూస్తున్న భారీ ప్రాజెక్ట్ ఏదైనా ఉందంటే అది సూపర్‌స్టార్ మహేష్ బాబు, దర్శకధీరుడు ఎస్.ఎస్. రాజమౌళి కాంబినేషన్‌లో తెరకెక్కుతున్న ‘వారణాసి’ సినిమానే. అంతర్జాతీయ స్థాయి కథాంశంతో, భారీ విజువల్స్‌తో రూపొందుతున్న ఈ ఎపిక్ మూవీపై ఇప్పటికే దేశవ్యాప్తంగా భారీ అంచనాలు నెలకొన్నాయి. ఈ సినిమా ఎప్పుడు థియేటర్లలోకి వస్తుందా? రాజమౌళి ఈసారి ఎలాంటి అద్భుతాన్ని చూపించబోతున్నారా? అని అభిమానులు ఆసక్తిగా ఎదురుచూస్తున్నారు. మరోవైపు షూటింగ్ చివరి దశకు చేరుకోవడంతో సినిమాకు సంబంధించిన బిజినెస్ వ్యవహారాలు కూడా హాట్ టాపిక్‌గా మారుతున్నాయి.

మహేష్ బాబు హీరోగా, ఎస్.ఎస్. రాజమౌళి దర్శకత్వంలో తెరకెక్కుతున్న ఈ చిత్రాన్ని కే.ఎల్. నారాయణ భారీ బడ్జెట్‌తో నిర్మిస్తున్నారు. ఈ సినిమాలో గ్లోబల్ స్టార్ ప్రియాంక చోప్రా, మలయాళ నటుడు పృథ్వీరాజ్ సుకుమారన్ కీలక పాత్రల్లో నటిస్తున్నారు. ఇప్పటికే ఈ సినిమా నుంచి వచ్చిన ప్రచార చిత్రాలు, గ్లింప్స్ ప్రేక్షకుల్లో భారీ ఆసక్తిని పెంచాయి. ప్రస్తుతం ఈ సినిమా షూటింగ్ దాదాపు పూర్తయినట్లు తెలుస్తోంది. ఈ ఏడాది చివరి నాటికి చిత్రీకరణను పూర్తి చేసి, అనంతరం పోస్ట్ ప్రొడక్షన్ పనులపై దృష్టి పెట్టాలని మేకర్స్ భావిస్తున్నట్లు సమాచారం. ప్రకటించిన షెడ్యూల్ ప్రకారం 2027 ఏప్రిల్ 7న ఈ చిత్రాన్ని ప్రపంచవ్యాప్తంగా థియేటర్లలో విడుదల చేయనున్నారు.

ఇప్పటికే ‘వారణాసి’ సినిమా థియేట్రికల్ బిజినెస్‌కు సంబంధించి భారీ మొత్తాలు వినిపిస్తున్నాయి. తెలుగు థియేట్రికల్ హక్కుల విషయంలో దాదాపు రూ.290 కోట్ల డీల్ జరిగినట్లు గతంలో వార్తలు వచ్చాయి. అయితే ఈ లావాదేవీపై అధికారిక ప్రకటన రావాల్సి ఉంది. మహేష్ బాబు స్టార్‌డమ్, రాజమౌళి బ్రాండ్ ఇమేజ్, సినిమాపై ఉన్న అంచనాల నేపథ్యంలో ఈ స్థాయిలో బిజినెస్ వార్తలు రావడం సినీ వర్గాల్లో చర్చనీయాంశంగా మారింది.ఇప్పుడు ఈ సినిమాకు సంబంధించిన డిజిటల్ హక్కుల వ్యవహారం మరింత ఆసక్తికరంగా మారింది. తాజా సోషల్ మీడియా ప్రచారం ప్రకారం ప్రముఖ ఓటీటీ సంస్థ నెట్‌ఫ్లిక్స్ ‘వారణాసి’ డిజిటల్ హక్కులను భారీ మొత్తానికి సొంతం చేసుకున్నట్లు వార్తలు వినిపిస్తున్నాయి. ముఖ్యంగా ఈ డీల్ విలువ ఏకంగా రూ.400 కోట్ల నుంచి రూ.500 కోట్ల వరకు ఉండొచ్చని పలు కథనాలు పేర్కొంటున్నాయి. అయితే ఇక్కడ మరో ఆసక్తికరమైన విషయం ఏమిటంటే.. కేవలం సినిమా ఓటీటీ హక్కులకే కాకుండా, సినిమా మేకింగ్‌కు సంబంధించిన ప్రత్యేక కంటెంట్, తెరవెనుక విశేషాలు, ఇతర ప్రమోషనల్ కంటెంట్‌ను కూడా కలిపి ఈ ఒప్పందం జరిగినట్లు ప్రచారం సాగుతోంది. దీంతో ఈ డీల్ విలువ మరింత భారీగా ఉంటుందనే చర్చ నడుస్తోంది.