Bigg Boss 10 | బిగ్‌బాస్ హౌస్‌లో ఎమోషనల్ ఫ్యామిలీ వీక్.. కన్నీళ్లు పెట్టుకున్న నరేష్, శ్వేతా, వంశీ

Bigg Boss 10 | బిగ్‌బాస్ తెలుగు సీజన్ 10లో ఫ్యామిలీ వీక్ సందడి మొదలైంది. ఇప్పటివరకు ఆటలు, గొడవలు, నామినేషన్లు, ఎలిమినేషన్లతో సాగిన హౌస్‌లోకి ఇప్పుడు కంటెస్టెంట్ల కుటుంబ సభ్యులు అడుగుపెడుతున్నారు. దీంతో ఇన్నాళ్లూ కుటుంబాలకు దూరంగా ఉన్న కంటెస్టెంట్లు తమ ఆత్మీయులను చూసి భావోద్వేగానికి గురవుతున్నారు. తాజాగా జరిగిన ఎపిసోడ్‌లో నరేష్, శ్వేతా, వంశీల కుటుంబ సభ్యులు హౌస్‌లోకి రావడంతో సందడి నెలకొంది. ముఖ్యంగా తమ కుటుంబ సభ్యులను చూసిన కంటెస్టెంట్లు కన్నీళ్లు పెట్టుకోవడం ప్రేక్షకులను కూడా ఎమోషనల్ చేసింది. తాజా ఎపిసోడ్‌లో ముందుగా బిగ్‌బాస్ హౌస్‌లో స్కూల్ టాస్క్ నిర్వహించారు. అంతకుముందు జరిగిన నామినేషన్ల ప్రక్రియలో కెప్టెన్ వంశీ మినహా మిగిలిన కంటెస్టెంట్లందరూ నామినేషన్లలో ఉన్నారు. ఈ నేపథ్యంలో ఫ్యామిలీ వీక్ ప్రారంభం కావడంతో హౌస్‌లో కొత్త ఉత్సాహం కనిపించింది.

స్కూల్ టాస్క్‌లో భాగంగా కంటెస్టెంట్లకు ప్రత్యేక బాధ్యతలు అప్పగించారు. శ్వేతా ఆర్ట్, పీటీ టీచర్‌గా, నీతూ డ్యాన్స్ టీచర్‌గా, దేబ్జానీ తెలుగు టీచర్‌గా, వర్షిణి కెమిస్ట్రీ టీచర్‌గా వ్యవహరించారు. నరేష్‌కు ప్రిన్సిపాల్‌తో పాటు ఇంగ్లీష్ టీచర్ బాధ్యతలు ఇచ్చారు. మిగిలిన కంటెస్టెంట్లంతా విద్యార్థులుగా మారిపోయారు. దీంతో అందరూ స్కూల్ యూనిఫామ్స్ వేసుకొని చిన్నపిల్లల్లా సందడి చేశారు. ముందుగా నరేష్ ఇంగ్లీష్ క్లాస్ తీసుకున్నారు. ఈ సందర్భంగా తనదైన శైలిలో కామెడీ చేస్తూ హౌస్‌మేట్స్‌ను నవ్వించారు. ఆ తర్వాత వర్షిణి కెమిస్ట్రీ క్లాస్ తీసుకోవడంతో స్కూల్ వాతావరణం మరింత సరదాగా మారింది.

ఫ్యామిలీ వీక్‌లో భాగంగా మొదట నరేష్ కుటుంబం నుంచి ఆయన సోదరుడు సురేష్ హౌస్‌లోకి వచ్చారు. చాలా రోజుల తర్వాత తన సోదరుడిని చూసిన నరేష్ ఒక్కసారిగా భావోద్వేగానికి గురయ్యారు. ఇద్దరూ ఆప్యాయంగా పలకరించుకొని హగ్ చేసుకున్నారు. అనంతరం సురేష్ హౌస్ మొత్తం కలియతిరుగుతూ అక్కడి కంటెస్టెంట్లతో మాట్లాడారు. నరేష్, సురేష్, రామ్ ప్రసాద్ కలిసి ప్రత్యేకంగా ఓ మీటింగ్ కూడా పెట్టుకున్నారు. ఈ సందర్భంగా సురేష్ తన సోదరుడికి కొన్ని విలువైన సలహాలు ఇచ్చారు. గేమ్‌లో ఎలా ఉండాలి? ఎలాంటి నిర్ణయాలు తీసుకోవాలి? అనే విషయాలపై మాట్లాడుకున్నట్లు తెలుస్తోంది. ఆ తర్వాత సురేష్ దేబ్జానీతో కూడా ప్రత్యేకంగా మాట్లాడారు. మరోవైపు నరేష్, సురేష్ కలిసి భోజనం చేయడం అందరినీ ఆకట్టుకుంది.

ఇక నరేష్ గతంలో గేమ్‌లో తీసుకున్న ఓ నిర్ణయం కూడా ఈ ఎపిసోడ్‌లో ప్రస్తావనకు వచ్చింది. ఓ ఛాలెంజ్‌లో భాగంగా తన కుటుంబ సభ్యులను కలిసే అవకాశాన్ని నరేష్ కోల్పోయారు. అయితే తన మాట మీద నిలబడి, ఇతర కంటెస్టెంట్ల కోసం త్యాగం చేసినందుకు ఆయన నిర్ణయాన్ని బిగ్‌బాస్ గుర్తించారు. అందుకే ఫ్యామిలీ వీక్‌లో మొదట నరేష్ కుటుంబ సభ్యులను హౌస్‌లోకి పంపించినట్లు బిగ్‌బాస్ వెల్లడించారు. అనంతరం సురేష్‌కు ప్రత్యేకంగా ఫుడ్ రింగ్ గేమ్ ఇచ్చారు. కొన్ని ఆహార పదార్థాలను చూపించి వాటిపై రింగులు వేయాలని, అలా ఎంపిక చేసిన ఆహారాన్ని ఇంట్లోని సభ్యులకు అందిస్తామని బిగ్‌బాస్ వివరించారు.

తర్వాత శ్వేతా కుటుంబ సభ్యులు హౌస్‌లోకి వచ్చారు. ముందుగా ఆమె అక్క రావడంతో శ్వేతా ఎంతో సంతోషంగా మాట్లాడుకున్నారు. ఆ తర్వాత తన తండ్రి హౌస్‌లోకి అడుగుపెట్టడంతో శ్వేతా భావోద్వేగానికి గురయ్యారు. తండ్రిని చూడగానే గట్టిగా హగ్ చేసుకొని కన్నీళ్లు పెట్టుకున్నారు. కూతురిని చూసిన ఆమె తండ్రి కూడా ఎమోషనల్ అయ్యారు. ఈ సందర్భంగా శ్వేతా హౌస్‌లో త్రిగున్ తనకు అందిస్తున్న సపోర్ట్ గురించి తండ్రితో చెప్పుకున్నారు. దీంతో శ్వేతా తండ్రి త్రిగున్‌తో ప్రత్యేకంగా మాట్లాడారు. అనంతరం అందరూ కలిసి డ్యాన్స్ చేస్తూ సరదాగా గడిపారు. శ్వేతా తండ్రికి కూడా బిగ్‌బాస్ ఫుడ్ రింగ్ టాస్క్ ఇచ్చారు. కుటుంబ సభ్యులతో కలిసి గడిపిన ఈ క్షణాలు శ్వేతాకు ఎంతో ప్రత్యేకంగా నిలిచాయి.

ఈ ఎపిసోడ్‌లో మరో హైలైట్ వంశీ ఫ్యామిలీ ఎంట్రీ. ముందుగా వంశీ కూతురు హౌస్‌లోకి వచ్చింది. తన కూతురిని చూడగానే వంశీ ఆనందంతో ఆమెను గట్టిగా హగ్ చేసుకొని కన్నీళ్లు పెట్టుకున్నారు. చాలా రోజుల తర్వాత కూతురిని చూసిన వంశీ భావోద్వేగాన్ని ఆపుకోలేకపోయారు.కూతురి కోసం వంశీ స్వయంగా వంట చేసి పెట్టడం విశేషం. అనంతరం తన కెప్టెన్ రూమ్‌కు తీసుకెళ్లి అక్కడి విషయాలను చూపించారు. కొంతసేపు కూతురితో సరదాగా గడిపారు. ఆ తర్వాత వంశీ భార్య కూడా హౌస్‌లోకి వచ్చారు. భార్యను చూడగానే వంశీ మరోసారి ఎమోషనల్ అయ్యారు. ఇద్దరూ ఆప్యాయంగా హగ్ చేసుకొని కొంతసేపు మాట్లాడుకున్నారు. తమ కుటుంబ సభ్యులను కలుసుకున్న వంశీ ఆనందానికి అవధులు లేకుండా పోయాయి.

వంశీ కుటుంబ సభ్యులు హౌస్‌లోకి వచ్చిన తర్వాత త్రిగున్‌తో ప్రత్యేకంగా మాట్లాడారు. ముఖ్యంగా వంశీ భార్య త్రిగున్‌కు ప్రత్యేకంగా థ్యాంక్స్ చెప్పారు. గేమ్‌లో వంశీకి సపోర్ట్ చేస్తున్నందుకు కృతజ్ఞతలు తెలిపారు. అంతేకాకుండా ‘బ్రో’ అంటూ ఆప్యాయంగా పలకరించారు. త్రిగున్ వంశీ కూతురితో సరదాగా ఆడుకున్నారు. మరోవైపు వంశీ, ఆయన భార్య కలిసి కూర్చొని మాట్లాడుకుంటున్న సమయంలో త్రిగున్ కూడా వారితో జాయిన్ అయ్యారు. ఈ సందర్భంగా వంశీ భార్య త్రిగున్‌పై ప్రశంసలు కురిపించారు.

నీ లాంటి ఫ్రెండ్ ఉండాలి అని, గేమ్‌ను ఇంత తెలివిగా ఆలోచిస్తూ ఆడుతున్న తీరు చాలా బాగుందని అభిప్రాయపడ్డారు. వంశీకి త్రిగున్ అందిస్తున్న మద్దతును ఆమె ప్రత్యేకంగా అభినందించారు. అనంతరం వంశీ భార్య హౌస్‌లోని మిగిలిన కంటెస్టెంట్లతో కూడా మాట్లాడారు.చివరగా వంశీ భార్య, కూతురికి కూడా బిగ్‌బాస్ ఫుడ్ రింగ్ టాస్క్ ఇచ్చారు. దీంతో వారి కుటుంబ సభ్యుల ఎంట్రీ మరింత సందడిగా ముగిసింది.