విస్తరిస్తున్న కొత్త కొవిడ్‌ వేరియంట్‌

• పలు దేశాల్లో పీజే.2.1 వ్యాప్తి

న్యూఢిల్లీ : కొవిడ్‌-19 కొత్త వేరియంట్‌ పీజే.2.1 అనేక దేశాలకు విస్తరించింది. దీనిని మొదట ఈ ఏడాది మే నెలలో కెనడాలోని ఒంటారియో ప్రావిన్స్‌లో గుర్తించారు. ఇది ఉత్తర అమెరికా, యూరోప్‌, ఆసియా, ఓషియానియాలలో పెరుగుతుండటంతో పరిశోధకులు దీని జన్యుపరమైన మార్పులు, మానవ కణాల్లో చేరే సామర్థ్యం గురించి పరీక్షిస్తున్నారు. గత నెలలో ‘ఇన్ఫెక్షన్‌’ జర్నల్‌లో ప్రచురితమైన ప్రాథమిక నివేదిక ప్రకారం, మానవ కణాల్లోకి ప్రవేశించగలిగే సామర్థ్యం పీజే.2.1కు ఎక్కువగా ఉండే అవకాశం ఉంది.

దీనికి తగిన క్లినికల్‌ ఆధారాలు ప్రస్తుతం లేవు. ఈ వైరస్‌ మ్యుటేషన్లకు ప్రత్యేక లక్షణాలను కూడా పరిశోధకులు ఇంకా గుర్తించలేదు. కొవిడ్‌-19 లక్షణాల మాదిరిగానే జ్వరం, శ్వాస సంబంధిత ఇన్ఫెక్షన్లు కూడా ఉండవచ్చునని, అందువల్ల కేవలం లక్షణాల ఆధారంగా అస్వస్థతకు కారణాన్ని గుర్తించడం సాధ్యం కాదని ప్రపంచ ఆరోగ్య సంస్థ పేర్కొంది.