Urea Fertilizer Sale | ఎరువుల విక్రయంలో వ్యాపారి ఇష్టారాజ్యం.. యూరియాతో పాటు నానో డీఏపీ కొనాల్సిందేనని షరతు!

18 November 2026 - 12:00
0 0
Urea Fertilizer Sale | ఎరువుల విక్రయంలో వ్యాపారి ఇష్టారాజ్యం.. యూరియాతో పాటు నానో డీఏపీ కొనాల్సిందేనని షరతు!
Jyothi Fertilizers

Urea Fertilizer Sale | దౌల్తాబాద్, నవంబర్ 17: రైతులకు ఎలాంటి ఇబ్బందులు లేకుండా ఎరువులు విక్రయించాల్సిన వ్యాపారులు నిబంధనలను ఉల్లంఘిస్తూ ఇష్టారాజ్యంగా వ్యవహరిస్తున్నారనే ఆరోపణలు వెల్లువెత్తుతున్నాయి. యూరియా బస్తాలు కావాలంటే అదనంగా నానో డీఏపీ కొనుగోలు చేయాల్సిందేనని షరతు విధిస్తూ రైతులను ఇబ్బందులకు గురిచేస్తున్నారని అన్నదాతలు ఆగ్రహం వ్యక్తం చేస్తున్నారు. సిద్దిపేట జిల్లా దౌల్తాబాద్ మండల కేంద్రంలోని జ్యోతి ఫర్టిలైజర్ దుకాణంలో ఈ తరహా విక్రయాలు జరుగుతున్నాయని రైతులు ఆరోపిస్తున్నారు.

మండలంలోని తిరుమలాపూర్ గ్రామానికి చెందిన రైతు చాకలి వెంకటయ్య ఆదివారం ఆన్‌లైన్‌లో 24 బస్తాల యూరియా బుక్ చేసుకున్నాడు. సోమవారం దుకాణానికి వస్తే మంగళవారం యూరియా ఇస్తామని చెప్పడంతో ఆయన తిరిగి వెళ్లాడు. మంగళవారం ఉదయం 10 గంటలకు యూరియా కోసం దుకాణానికి చేరుకున్న రైతు సాయంత్రం 4 గంటల వరకు నిరీక్షించినా బస్తాలు అందించలేదని ఆవేదన వ్యక్తం చేశాడు.

యూరియా కావాలంటే నానో డీఏపీ కూడా కొనుగోలు చేయాలని దుకాణ యజమాని గోపిశెట్టి శ్రీనివాస్ షరతు విధించినట్లు వెంకటయ్య ఆరోపించాడు. అదనపు ఎరువులు కొనుగోలు చేయలేమని చెప్పినా యూరియా ఇచ్చేందుకు నిరాకరించారని తెలిపాడు. అంతేకాకుండా ఈ విషయాన్ని ఎవరికి చెప్పుకుంటారో చెప్పుకోండి.. నానో డీఏపీతో కలిపే యూరియా విక్రయిస్తానంటూ దురుసుగా సమాధానం ఇచ్చారని రైతులు వాపోయాడు.

రైతుల ఇబ్బందులు పట్టించుకునేదెవరు?

వ్యవసాయ పనులు ముమ్మరంగా సాగుతున్న తరుణంలో యూరియా కోసం రైతులు ఎరువుల దుకాణాల చుట్టూ తిరగాల్సి వస్తోందని ఆవేదన వ్యక్తం చేస్తున్నారు. జ్యోతి ఫర్టిలైజర్‌లో నిత్యం యూరియాతో పాటు నానో డీఏపీని తప్పనిసరిగా కొనుగోలు చేయాలని ఒత్తిడి చేస్తున్నారని ఆరోపిస్తున్నారు. గతంలోనూ ఇలాంటి ఫిర్యాదులు వచ్చినప్పటికీ అధికారులు తగిన చర్యలు తీసుకోవడం లేదని అసహనం వ్యక్తం చేస్తున్నారు. ఇప్పటికైనా జిల్లా వ్యవసాయ శాఖ అధికారులు స్పందించి క్షేత్రస్థాయిలో తనిఖీలు చేపట్టాలని రైతులు కోరుతున్నారు. తమ ఫిర్యాదులపై సమగ్ర విచారణ జరిపి, ఆరోపణలు నిజమని తేలితే బాధ్యులపై చర్యలు తీసుకోవాలని డిమాండ్ చేస్తున్నారు.

Comments (0)

User