Balmoor Venkat | ఎమ్మెల్సీ బల్మూరి వెంకట్ కారుకు ప్రమాదం.. దంపతులకు తప్పిన పెను ముప్పు!

Balmoor Venkat | కాంగ్రెస్ ఎమ్మెల్సీ, ప్రభుత్వ విప్ డాక్టర్ బల్మూరి వెంకట్ ప్రయాణిస్తున్న కారు రోడ్డు ప్రమాదానికి గురైంది. రంగారెడ్డి జిల్లా కొత్తూరు జంక్షన్ సమీపంలోని జాతీయ రహదారిపై మంగళవారం అర్ధరాత్రి దాటిన తర్వాత ఈ ఘటన చోటుచేసుకుంది. తిరుపతి నుంచి హైదరాబాద్కు తిరిగి వస్తుండగా ఆయన కారు ముందున్న డీసీఎం వాహనాన్ని ఢీకొట్టింది. ఈ ప్రమాదంలో కారు ముందు భాగం పూర్తిగా ధ్వంసమైంది. అయితే బల్మూరి వెంకట్, ఆయన సతీమణి ప్రాణాపాయం నుంచి బయటపడ్డారు.
బల్మూరి వెంకట్ తన భార్యతో పాటు సోదరుడు చాణక్య, డ్రైవర్ శ్రీకాంత్తో కలిసి తిరుపతి నుంచి హైదరాబాద్కు కారులో బయలుదేరారు. ఈ క్రమంలో కొత్తూరు బైపాస్ సమీపంలోని దర్గా చౌరస్తా వద్దకు చేరుకోగానే ముందుగా వెళ్తున్న కోళ్ల లోడుతో కూడిన డీసీఎం వాహనాన్ని కారు వెనుక నుంచి ఢీకొట్టినట్లు తెలుస్తోంది. అర్ధరాత్రి దాటిన తర్వాత ఈ ప్రమాదం జరిగినట్లు సమాచారం. ఈ ప్రమాదంలో కారు ముందు భాగం తీవ్రంగా దెబ్బతింది. డ్రైవర్ శ్రీకాంత్, ఎమ్మెల్సీ సోదరుడు చాణక్యకు స్వల్ప గాయాలయ్యాయి. బల్మూరి వెంకట్, ఆయన సతీమణి ఎలాంటి ప్రాణాపాయం లేకుండా బయటపడ్డారు. దీంతో కుటుంబ సభ్యులు, కాంగ్రెస్ పార్టీ శ్రేణులు ఊపిరి పీల్చుకున్నారు.
ఘటనపై సమాచారం అందుకున్న పోలీసులు ప్రమాద స్థలానికి చేరుకుని వివరాలు సేకరించారు. ప్రమాదానికి గల కారణాలపై దర్యాప్తు చేపట్టారు. ఈ ఘటనకు సంబంధించిన మరిన్ని వివరాలు తెలియాల్సి ఉంది.
డీసీఎంను వెనుక నుండి ఢీకొట్టిన కాంగ్రెస్ ఎమ్మెల్సీ బల్మూరి వెంకట్ కారు
తిరుపతి నుంచి హైదరాబాద్ వస్తుండగా రంగారెడ్డి జిల్లా కొత్తూరు జంక్షన్ వద్ద తెల్లవారుజామున కోళ్ల లోడుతో వెళ్తున్న డీసీఎంను ఢీకొట్టిన బల్మూరి వెంకట్ కారు
డ్రైవర్ శ్రీకాంత్, వెంకట్ తమ్ముడు చాణక్యకు స్వల్ప గాయాలు కాగా డీసీఎం డ్రైవరును అదుపులోకి తీసుకున్నట్లు సమాచారం
— Telugu Scribe (@TeluguScribe) November 18, 2026
Comments (0)