Running | రన్నింగ్తో కాళ్ల కండరాలు పెరుగుతాయా? కొవ్వు మాత్రమే తగ్గుతుందా?

Running | ప్రతిరోజూ రన్నింగ్ చేయడం వల్ల కాళ్ల కండరాలు చురుగ్గా పనిచేస్తాయి. ముఖ్యంగా తొడలు, పిరుదులు, పిక్కల కండరాలకు వ్యాయామం లభిస్తుంది. అయితే రన్నింగ్ ఒక్కటే చేస్తే కండరాల పరిమాణం గణనీయంగా పెరగదు. రన్నింగ్ విధానం, వేగం, వ్యాయామ తీవ్రత, ఆహారం, విశ్రాంతిపై ఫలితాలు ఆధారపడి ఉంటాయి. కండరాల పరిమాణాన్ని పెంచుకోవాలంటే బరువులతో చేసే వ్యాయామాలు కూడా అవసరం.
రన్నింగ్ చేస్తే ఏం జరుగుతుంది..?
బరువు తగ్గడం, క్యాలరీలు ఖర్చు చేయడం, గుండె ఆరోగ్యాన్ని మెరుగుపరుచుకోవడం కోసం చాలామంది ప్రతిరోజూ రన్నింగ్ చేస్తుంటారు. అయితే రన్నింగ్ సమయంలో క్వాడ్రిసెప్స్ (తొడ ముందు భాగం), హ్యామ్స్ట్రింగ్స్ (తొడ వెనుక భాగం), గ్లూట్స్ (పిరుదుల కండరాలు), కాఫ్ మజిల్స్ (పిక్కల కండరాలు) చురుగ్గా పనిచేస్తాయి. ముఖ్యంగా కొత్తగా రన్నింగ్ ప్రారంభించినవారిలో కొంత కండరాల అభివృద్ధి కనిపిస్తుంది. సాధారణ జాగింగ్తో కండరాల ఓర్పు పెరుగుతుంది. గతంలో కొద్దిదూరం పరిగెత్తడానికే అలసిపోయేవారు, క్రమంగా ఎక్కువ దూరం పరిగెత్తగలుగుతారు. అయితే కండరాల పరిమాణం గణనీయంగా పెరగాలంటే స్క్వాట్స్, స్ప్లిట్ స్క్వాట్స్, కాఫ్ రైజెస్, హ్యామ్స్ట్రింగ్ కర్ల్స్ వంటి బలవర్ధక వ్యాయామాలు అవసరం. 2022లో 43 అధ్యయనాలపై నిర్వహించిన సమీక్ష ప్రకారం, ఏరోబిక్ వ్యాయామంతోపాటు రెసిస్టెన్స్ ట్రైనింగ్ చేయడం వల్ల కండరాల పరిమాణం, గరిష్ఠ బలంలో మెరుగైన ఫలితాలు సాధించవచ్చని వెల్లడైంది.
స్ప్రింటింగ్ ఎంతో మేలు..
సాధారణంగా లాంగ్ డిస్టెన్స్ రన్నింగ్తో పోలిస్తే స్ప్రింటింగ్ (అతి వేగంగా పరిగెత్తడం) కండరాలపై ఎక్కువ ఒత్తిడిని కలిగిస్తుంది. స్ప్రింటింగ్ సమయంలో గ్లూట్స్, హ్యామ్స్ట్రింగ్స్, కాఫ్ మజిల్స్ అధిక శక్తితో పనిచేస్తాయి. అందువల్ల కండరాల అభివృద్ధికి కొంత ఎక్కువ ప్రేరణ లభిస్తుంది. మరోవైపు ఎక్కువ దూరం పరిగెత్తడం వల్ల కండరాల ఓర్పు, గుండె సామర్థ్యం మెరుగుపడతాయి. స్ప్రింటర్లు సాధారణంగా లాంగ్ డిస్టెన్స్ రన్నర్లతో పోలిస్తే ఎక్కువ కండరాలతో కనిపించడానికి ఇదొక కారణం. అయితే జన్యుపరమైన లక్షణాలు, బరువులతో చేసే వ్యాయామాలు, పోషకాహారం కూడా దీనిపై ప్రభావం చూపుతాయి. రన్నింగ్ వల్ల శరీరంలో క్యాలరీల ఖర్చు పెరిగి కొవ్వు తగ్గడానికి సహాయపడుతుంది. సరైన ఆహార నియమాలు పాటిస్తే తొడలు, కాళ్ల చుట్టూ ఉన్న కొవ్వు కూడా తగ్గుతుంది. అయితే శరీరంలోని ఒక నిర్దిష్ట భాగంలో మాత్రమే కొవ్వును తగ్గించడం సాధ్యం కాదు. కొవ్వు తగ్గినప్పుడు ఇప్పటికే ఉన్న కండరాలు మరింత స్పష్టంగా కనిపించి కాళ్లు సన్నగా, దృఢంగా కనిపిస్తాయి.
ఏయే కండరాలు పనిచేస్తాయి..
రన్నింగ్ సమయంలో గ్యాస్ట్రోక్నీమియస్, సోలియస్ అనే పిక్కలలోని రెండు ప్రధాన కండరాలు పనిచేస్తాయి. ముఖ్యంగా కొండ ప్రాంతాల్లో పరిగెత్తడం, ఎత్తుకు పరుగెత్తడం, స్ప్రింటింగ్ చేయడం వల్ల వీటిపై ఒత్తిడి పెరుగుతుంది. అయినప్పటికీ పిక్కల కండరాలు ఎంత పెరుగుతాయనేది వ్యాయామ తీవ్రత, క్రమంగా పెంచే బరువు, జన్యుపరమైన లక్షణాలు, విశ్రాంతిపై ఆధారపడి ఉంటుంది. మరోవైపు అతిగా రన్నింగ్ చేయడం, తగినంత క్యాలరీలు, ప్రోటీన్ తీసుకోకపోవడం వల్ల కండరాల అభివృద్ధికి ఆటంకం కలుగుతుంది. కండరాలను కాపాడుకోవడానికి తగినంత ఆహారం, ప్రోటీన్, నిద్ర, విశ్రాంతి అవసరం. 2024లో 23 మంది పురుష కాలేజీ స్ప్రింటర్లపై ఎంఆర్ఐ ద్వారా ఏడాది పాటు నిర్వహించిన అధ్యయనంలో హ్యామ్స్ట్రింగ్స్ సహా కొన్ని కండరాలు పెరిగినట్లు గుర్తించారు. అయితే వారు వెయిట్ ట్రైనింగ్, జంప్ ట్రైనింగ్ కూడా చేయడంతో కండరాల పెరుగుదలలో స్ప్రింటింగ్ పాత్రను మాత్రమే ప్రత్యేకంగా నిర్ధారించలేకపోయారు.
కాబట్టి కాళ్లు బలంగా, కండరాలతో దృఢంగా ఉండాలనుకునేవారు వారానికి రెండు నుంచి మూడు రోజులు స్క్వాట్స్, రొమేనియన్ డెడ్లిఫ్ట్స్, లంజెస్, లెగ్ ప్రెస్, కాఫ్ రైజెస్, హిప్ థ్రస్ట్స్ వంటి వ్యాయామాలు చేస్తూ, మితమైన స్థాయిలో రన్నింగ్ను కొనసాగించడం మంచిది. సరైన పోషకాహారం, ప్రోటీన్, నిద్రకు ప్రాధాన్యత ఇవ్వాలి. గుండె ఆరోగ్యం, కండరాల ఓర్పు కోసం రన్నింగ్ ఉపయోగపడితే, కండరాల పరిమాణం, బలం పెంచుకోవడానికి స్ట్రెంత్ ట్రైనింగ్ మరింత కీలకమని నిపుణులు సూచిస్తున్నారు.
Comments (0)