Allu Aravind | అల్లు సినిమాస్లో టికెట్ల బ్లాకింగ్పై ప్రేక్షకుల ఆగ్రహం.. వెంటనే వీడియో కాల్ చేసిన అల్లు అరవింద్,అక్కడికక్కడే కీలక నిర్ణయం!

Allu Aravind |హైదరాబాద్లోని ప్రముఖ మల్టీప్లెక్స్ ‘అల్లు సినిమాస్’ మరోసారి వార్తల్లో నిలిచింది. అత్యాధునిక డాల్బీ సౌండ్ సిస్టమ్, భారీ స్క్రీన్తో సినీ అభిమానులను ఆకట్టుకుంటున్న ఈ థియేటర్లో టికెట్ల బుకింగ్పై కొంతకాలంగా ఫిర్యాదులు వస్తున్నాయి. ముఖ్యంగా పెద్ద సినిమాలు విడుదలైనప్పుడు ఆన్లైన్లో టికెట్లు అందుబాటులో ఉండటం లేదని, థియేటర్ యాజమాన్యం కొన్ని సీట్లను ముందుగానే బ్లాక్ చేస్తోందని ప్రేక్షకులు ఆరోపిస్తున్నారు. తాజాగా ఈ సమస్య నేరుగా ప్రముఖ నిర్మాత అల్లు అరవింద్ దృష్టికి వెళ్లింది. దీంతో ఆయన వెంటనే స్పందించి మేనేజ్మెంట్కు వీడియో కాల్ చేయడం ఆసక్తికరంగా మారింది.
అల్లు సినిమాస్లో సినిమా చూడాలని చాలామంది ప్రేక్షకులు ఆసక్తి చూపిస్తుంటారు. అయితే భారీ చిత్రాల విడుదల సమయంలో టికెట్లు బుక్ చేసుకోవడం కష్టంగా మారుతోందని కొందరు సినీ ప్రియులు ఆవేదన వ్యక్తం చేస్తున్నారు. ఆన్లైన్ బుకింగ్ యాప్స్లో డాల్బీ స్క్రీన్కు సంబంధించిన టికెట్లు కనిపించడం లేదని చెబుతున్నారు. తాజాగా థియేటర్కు వచ్చిన అల్లు అరవింద్కు కొందరు ప్రేక్షకులు ఇదే విషయాన్ని వివరించారు. థియేటర్ నుంచి బయటకు వస్తున్న ఆయనను ఆపి తమ సమస్యను నేరుగా చెప్పుకున్నారు. షో ప్రారంభమయ్యే వరకు ఎక్కువ సీట్లను బ్లాక్ చేసి ఉంచుతున్నారని, చివరి నిమిషంలోనే వాటిని ఆన్లైన్లో అందుబాటులోకి తీసుకొస్తున్నారని ఫిర్యాదు చేశారు.
ప్రేక్షకులు చెప్పిన విషయాలను విన్న అల్లు అరవింద్ వెంటనే స్పందించారు. అసలు సమస్య ఏమిటో తెలుసుకునేందుకు ప్రయత్నించారు. ఈ క్రమంలో తన సిబ్బందికి ఫోన్ చేస్తానని చెప్పి, వెంటనే మేనేజ్మెంట్ బృందానికి వీడియో కాల్ చేశారు. అనంతరం ఫోన్ కెమెరాను ప్రేక్షకుల వైపు తిప్పి వారి సమస్యను నేరుగా సిబ్బందికి వివరించాలని కోరారు. మొదట కొంత సంకోచించిన అభిమానులకు కూడా ధైర్యం చెప్పారు. పర్వాలేదు.. సమస్య ఏమిటో స్పష్టంగా చెప్పండంటూ ప్రోత్సహించారు. దీంతో ప్రేక్షకులు టికెట్ల బ్లాకింగ్ వల్ల తాము ఎదుర్కొంటున్న ఇబ్బందులను మేనేజ్మెంట్కు వివరించారు. ప్రేక్షకుల ఫిర్యాదులపై స్పందించిన అల్లు అరవింద్ కీలక హామీ ఇచ్చారు. ఇకపై కేవలం రెండు వరుసలు మాత్రమే ఉంచి, మిగతా టికెట్లన్నింటినీ సాధారణ ప్రేక్షకులకు అందుబాటులోకి తీసుకురావాలని ఆదేశిస్తానని తెలిపారు. ఈ వ్యవహారాన్ని తానే స్వయంగా పర్యవేక్షిస్తానని భరోసా ఇచ్చారు.
Comments (0)