సువర్ణావకాశం..!

21 November 2026 - 07:30
0 0
సువర్ణావకాశం..!
Gold
  • దిగొస్తున్న బంగారం ధరల నేపథ్యంలో కొనుగోళ్లపై నిపుణుల మాటేంటి 

న్యూఢిల్లీ, నవంబర్‌ 20: బంగారం ధరలు రోజురోజుకూ దిగొస్తున్నాయి. ప్రస్తుతం మార్కెట్లో నెలకొన్న ఈ డౌన్‌ ట్రెండ్‌.. పెండ్లిళ్ల సీజన్‌ దృష్ట్యా కొనుగోలుదారులకు కలిసొచ్చే అంశమే. అయినప్పటికీ ఆగకుండా పడిపోతున్న రేట్లను చూసి ఇంకా తగ్గుతుందేమో.. కొన్ని రోజులు ఆగి కొంటే మరింతగా లాభం వస్తుందేమోనన్న డైలమాలో ఎక్కువమంది ఉంటున్నారిప్పుడు. మరి నిపుణులు ఏమంటున్నారు?

ధరల్లో భారీ క్షీణత

ఈ నెల 17న బులియన్‌ మార్కెట్లో 24 క్యారెట్‌ (99.9 స్వచ్ఛత) 10 గ్రాముల పుత్తడి రేటు రూ.1,38,600 పలికింది. అయితే ఈ ఏడాది జనవరి 29న ఆల్‌టైమ్‌ హైని తాకుతూ రూ.1,83,000గా ఉన్నది. దీన్నిబట్టి నవంబర్‌ 17న కొన్నవారికి రూ.44,400 లాభం వచ్చినట్టే. అలాగే ఎంసీఎక్స్‌ (మల్టీ కమోడిటీ ఎక్స్చేంజీ)లో 17నాటి ధర 10 గ్రాములకు రూ.1,33,530గా నమోదైంది. జనవరి 29న రూ.1,75,231 గరిష్ఠ ధరతో పోలిస్తే ఇది దాదాపు 24 శాతం తక్కువ. అంటే మదుపర్లకు సుమారు రూ.41,701 ఆదా అయినట్టే.

ఇదీ సంగతి..

ప్రస్తుత ట్రెండ్‌నుబట్టి పసిడి ధరల్లో ఇప్పుడప్పుడే ఒక్కసారిగా భారీ పెరుగుదల ఏమీ ఉండదనే నిపుణుల అంచనా. నిజానికి ఈ పెండ్లిళ్ల సీజన్‌లో 22 క్యారెట్‌ (99.5 స్వచ్ఛత) గోల్డ్‌ రేటు (శుక్రవారం) రూ.1,25,000 దరిదాపుల్లోకి రావడం కొనుగోలుదారులకు గొప్ప ఊరటగానే చెప్పుకోవచ్చన్నది మెజారిటీ ఎక్స్‌పర్ట్స్‌ మాట. అవసరం మేరకు ఎంతో కొంత కొనడమే ఉత్తమమంటున్నారు.

కల్తీ బంగారంతో జాగ్రత్త

బంగారం బరువు పెంచేందుకు రీనియం, ఇరిడియం ఆధారిత మిశ్రమాలను వాడుతున్నారన్న కథనాలపై భారతీయ ప్రమాణాల బ్యూరోకు (బీఐఎస్‌) సమాచారం ఇచ్చినట్టు అఖిల భారత రత్నాలు, ఆభరణాల మండలి (జీజేసీ) శుక్రవారం తెలిపింది. ఈ విషయంలో నగల పరిశ్రమ, వినియోగదారులు అప్రమత్తంగా ఉండాలని కోరింది. ‘బంగారంలో రీనియం, ఇరిడియం వంటి పదార్థాల దుర్వినియోగానికి వీలుందన్న వార్తలు వస్తున్నాయి. ఈ అంశాన్ని బీఐఎస్‌ అత్యంత తీవ్రంగా పరిగణిస్తున్నది’ అని జీజేసీ చైర్మన్‌ రాజేశ్‌ రోక్డే ఒక ప్రకటనలో తెలిపారు. మార్కెట్లో ధరలు తగ్గుతున్న నేపథ్యంలో పెరుగుతున్న కొనుగోళ్లను ఆసరాగా చేసుకొని మోసగాళ్లు అక్రమాలకు పాల్పడుతున్నారు. దీంతో అనుమానం వస్తే వెంటనే జీజేసీ, బీఐఎస్‌కు ఫిర్యాదు చేయాలని మండలి విజ్ఞప్తి చేస్తున్నది. కాగా, బీఐఎస్‌ కేర్‌ యాప్‌ ద్వారా నగలపైనున్న హాల్‌మార్క్‌ వివరాలను పరిశీలించాలని, జీఎస్టీ చెల్లించిన బిల్లులను తప్పనిసరిగా తీసుకోవాలని కూడా ఈ సందర్భంగా వినియోగదారులకు రోక్డే సూచించారు.

తులం రూ.5,200 డౌన్‌

శుక్రవారం బంగారం, వెండి ధరలు మరింతగా తగ్గాయి. ఢిల్లీలో 24 క్యారెట్‌ 10 గ్రాములు ఈ ఒక్కరోజే ఏకంగా రూ.5,200 దిగి రూ.1,29,300 (అన్ని పన్నులు సహా)గా నమోదైంది. రేట్లు క్షీణించడం వరుసగా ఇది 9వ రోజు కావడం గమనార్హం. గడిచిన 9 రోజుల్లో రూ.17,600 క్షీణించింది. ఇక హైదరాబాద్‌లో 22 క్యారెట్‌ గోల్డ్‌ వాల్యూ రూ.1,25,100గా ఉన్నది. మరోవైపు వెండి ధర రూ.4,000 పడిపోయి కిలో రూ.1.58 లక్షలు (అన్ని పన్నులు సహా)గా ఉన్నది. అంతర్జాతీయ మార్కెట్లో ఔన్స్‌ గోల్డ్‌ 38.99 డాలర్లు పతనమై 3,586.32 డాలర్లు పలికింది. సిల్వర్‌ 42.62 డాలర్లుగా ట్రేడైంది.

ఇప్పుడు కొనొచ్చా..

ఇంట్లో పెండ్లిళ్లు, ఇతరత్రా శుభకార్యాలున్నవారికి ఈ ధరల సవరణ మంచి అవకాశమేనని ఇండియా బులియన్‌ అండ్‌ జ్యువెలర్స్‌ అసోసియేషన్‌ లిమిటెడ్‌ (ఐబీజేఏ) అధ్యక్షుడు పృథ్వీరాజ్‌ కోఠారి అంటున్నారు. ధరలు ఇంకొంత తగ్గుతాయన్న అంచనాలుంటే నగలను విడుతల వారీగానైనా కొనుగోలు చేయాలని సూచించారు. అలాగే కొనుగోలుకు ముందు కనీసం ముగ్గురు జ్యువెలర్లను పోల్చి చూడాలని, మేకింగ్‌ చార్జీలు 6 శాతం నుంచి 25 శాతానికిపైగా ఉండవచ్చన్నారు. అయితే ‘మెషీన్‌తో తయారుచేసిన చైన్లు, గాజులు, సాధారణ ఉంగరాలపై మేకింగ్‌ చార్జీలు అత్యల్పంగా, తరచూ 6-12 శాతం మధ్యే ఉంటాయి. తిరిగి అమ్మేటప్పుడు ఇవి బంగారం ధరకు దగ్గరగా విలువ ఇస్తాయి. బరువైన రాళ్లు పొదిగిన లేదా కుందన్‌ నగలు నష్టంగా మారవచ్చు.

వాటిలోని రాళ్లను తరచూ బంగారంతో కలిపి తూచి ధర నిర్ణయిస్తారు. తిరిగి అమ్మేటప్పుడు వాటి విలువను తీసివేస్తారు’ అని కోఠారి గుర్తుచేశారు. ఇక ‘త్వరలో పెండ్లిళ్లు ఉన్నవారు మరోసారి ధరలు తగ్గుతాయేమోనని ఎక్కువ కాలం వేచి ఉండకుండా ప్రస్తుత ధరల ప్రయోజనం పొందడం మంచిది‘ అని ఆగ్‌మాంట్‌కు చెందిన అకోయిరా డైరెక్టర్‌ ఆరవ్‌ బఫ్నా సూచిస్తున్నారు. కాగా, ల్యాబ్‌లో తయారుచేసిన వజ్రాలు పొదిగిన తక్కువ క్యారెట్‌ బంగారు నగలకు ప్రాధాన్యం ఇవ్వడం లాభదాయకమని బఫ్నా చెప్తున్నారు. సంప్రదాయ కొనుగోళ్లకు 22 క్యారెట్ల బంగారం ఇప్పటికీ ప్రాధాన్య ఎంపికగా ఉన్నా.. ఆధునిక డిజైన్లకు 9 క్యారెట్లు, 14 క్యారెట్లు, 18 క్యారెట్ల బంగారు నగలు మరింత సౌలభ్యం ఇస్తాయని పేర్కొన్నారు.

  • ధరలను ప్రభావితం చేస్తున్న అంశాలు
  • ఫెడ్‌ రిజర్వ్‌ వడ్డీరేట్ల పెంపు అంచనాలు
  • బలపడుతున్న డాలర్‌ ఇండెక్స్‌
  • ఆకర్షణీయంగా బాండ్లలో పెట్టుబడులు
  • గోల్డ్‌కు తగ్గుతున్న డిమాండ్‌
  • లాభాల స్వీకరణలో మదుపర్లు

 

Comments (0)

User