కాంగ్రెస్ నేత రేఖానాయక్ ఇంట్లో ఈడీ సోదాలు

ఖానాపూర్, నవంబర్ 20 : నిర్మల్ జిల్లా ఖానాపూర్ మండల కేంద్రంలోని కాంగ్రెస్ నాయకురాలు, మాజీ ఎమ్మెల్యే రేఖా నాయక్ నివాసంలో శుక్రవారం ఎన్ఫోర్స్మెంట్ డైరెక్టరేట్ (ఈడీ) అధికారులు సోదాలు నిర్వహించారు. గతంలో ఖానాపూర్ మండలం సత్తెనపల్లిలో ఆమెకు సంబంధించి ఏఆర్ఎస్ ఇండస్ట్రీస్ రైస్మిల్లులో విజిలెన్స్ అండ్ ఎన్ఫోర్స్మెంట్ అధికారులు నిర్వహించిన తనిఖీల్లో సీఎంఆర్లో అక్రమాలు వెలుగులోకి రావడంతో విజిలెన్స్ అధికారులు ఈడీకి ఫిర్యాదు చేశారు. రంగంలోకి దిగిన ఈడీ అధికారులు మాజీ ఎమ్మెల్యే రేఖా నాయక్ నివాసంలోనూ సోదాలు చేపట్టారు.
శుక్రవారం తెల్లవారుజామున 6 గంటలకు ప్రారంభమైన తనిఖీలు దాదాపు తొమ్మిది గంటలపాటు కొనసాగాయి. గత ఆగస్టు 19న ఏఆర్ఎస్ ఇండస్ట్రీస్లో నిర్వహించిన తనిఖీల్లో మూడు సీజన్లకు సంబంధించి మొత్తం 9,639.962 టన్నుల ప్రభుత్వ ధాన్యం కొరత ఉన్నట్టు విజిలెన్స్ అధికారులు గుర్తించారు. దీని విలువ సుమారు రూ.40.96 కోట్లుగా అంచనా వేశారు. రేఖానాయక్ మాట్లాడుతూ.. రైస్ మిల్ను విక్రయించి బకాయిలు చెల్లిస్తానని తెలిపారు.
Comments (0)