Realme | రియల్‌మీ ఫోన్‌ యూజర్లకు గుడ్‌న్యూస్‌.. నవంబర్‌ 16 నుంచి కొత్త విధానం అమల్లోకి!

Realme | రియల్‌మీ స్మార్ట్‌ఫోన్‌ వినియోగదారులకు గుడ్‌న్యూస్‌. ఇకపై ఫోన్‌ రిపేర్‌ చేయించుకోవడానికి రియల్‌మీ సర్వీస్‌ సెంటర్ల కోసం వెతకాల్సిన అవసరం ఉండకపోవచ్చు. ఒప్పోకు చెందిన సర్వీస్‌ సెంటర్లలోనూ రియల్‌మీ ఫోన్లకు మరమ్మతులు, ఇతర సేవలు అందుబాటులోకి రానున్నాయి. ఇందుకోసం దేశవ్యాప్తంగా తన ఆఫ్టర్‌ సేల్స్‌ సర్వీస్‌ నెట్‌వర్క్‌ను రియల్‌మీ విస్తరిస్తోంది. ఈ కొత్త విధానం నవంబర్‌ 16 నుంచి అమల్లోకి రానుంది.

550 నగరాల్లో 670కి పైగా సర్వీస్‌ సెంటర్లు

రియల్‌మీ గురువారం విడుదల చేసిన ప్రకటన ప్రకారం.. ఒప్పోకు చెందిన ప్రస్తుత సర్వీస్‌ నెట్‌వర్క్‌ను వినియోగించుకొని భారత్‌లో తన సేవలను విస్తరించనుంది. ఈ మార్పుతో దేశవ్యాప్తంగా 550కి పైగా నగరాల్లో 670కు మించిన కేంద్రాల్లో రియల్‌మీ ఫోన్లకు సర్వీసులు అందనున్నాయి. ఇప్పటికే ఉన్న రియల్‌మీ సర్వీస్‌ కేంద్రాలు తమ బ్రాండింగ్‌తోనే కొనసాగుతాయి. వాటిని మరింత మెరుగైన సదుపాయాలతో అభివృద్ధి చేయనున్నట్లు కంపెనీ తెలిపింది. సర్వీస్‌ నెట్‌వర్క్‌ విస్తరణతో 1,500 మందికి పైగా సర్టిఫైడ్‌ టెక్నికల్‌ ఇంజినీర్లు వినియోగదారులకు అందుబాటులో ఉంటారని రియల్‌మీ వెల్లడించింది. ఫోన్ల మరమ్మతుల్లో ఒకే విధమైన ప్రమాణాలను పాటించడంతో పాటు నాణ్యమైన సాంకేతిక సహాయం అందిస్తామని పేర్కొంది. రిపేర్ల సమయంలో 100 శాతం ఒరిజినల్‌ విడిభాగాలనే ఉపయోగిస్తామని స్పష్టం చేసింది.

రిపేర్లపై డిస్కౌంట్లు.. ఉచిత సేవలు కూడా!

నెట్‌వర్క్‌ విస్తరణతో పాటు రియల్‌మీ, ఒప్పో వినియోగదారులకు ప్రతి నెల నిర్వహించే సర్వీస్‌ డే సందర్భంగా ప్రత్యేక ప్రయోజనాలు అందించనున్నారు. స్క్రీన్‌, బ్యాటరీ, బ్యాక్‌ కవర్‌ రిపేర్లపై డిస్కౌంట్లు కల్పించనున్నారు. అంతేకాదు.. ఉచితంగా స్క్రీన్‌ ప్రొటెక్టర్‌ ఏర్పాటు, ఫోన్‌ క్లీనింగ్‌, సాఫ్ట్‌వేర్‌ అప్‌డేట్లు అందించనున్నారు. లేబర్‌ ఛార్జీలను మాఫీ చేయడంతో పాటు సర్వీస్‌ సెంటర్లకు వచ్చే కస్టమర్లకు స్నాక్స్‌, డ్రింక్స్ కూడా అందించనున్నట్లు కంపెనీ తెలిపింది.