Priya Bhavani Shankar | త్వరలో పెళ్లిపీటలెక్కనున్న ఇరుముడి హీరోయిన్ .. అబ్బాయి మ‌రెవ‌రో కాదు..!

Priya Bhavani Shankar | తమిళ చిత్ర పరిశ్రమలో తనకంటూ ప్రత్యేక గుర్తింపు తెచ్చుకున్న హీరోయిన్ ప్రియా భవానీ శంకర్ త్వరలోనే వైవాహిక జీవితంలోకి అడుగుపెట్టబోతుంది. గత కొన్నేళ్లుగా తన ప్రియుడు రాజ్‌వెల్ రాజ్‌తో ప్రేమలో ఉన్న ఈ బ్యూటీ.. ఇప్పుడు అతడితో ఏడడుగులు వేయడానికి సిద్ధమవుతున్నట్లు తెలుస్తోంది. తాజాగా ప్రియా తన సోషల్ మీడియా ఖాతాలో షేర్ చేసిన కొన్ని ఫోటోలు ఈ వార్తలకు మరింత బలాన్ని చేకూరుస్తున్నాయి. దీంతో అభిమానులు, నెటిజన్లు ఈ జంటకు ముందుగానే శుభాకాంక్షలు తెలియజేస్తున్నారు.ప్రియా భవానీ శంకర్ తన ఇన్‌స్టాగ్రామ్ స్టోరీస్‌లో కొన్ని ప్రత్యేకమైన ఫోటోలను అభిమానులతో పంచుకున్నారు.

ఈ ఫోటోల్లో ఆమె సాంప్రదాయ దుస్తుల్లో ఎంతో అందంగా కనిపించడంతో పాటు, మెడలో మల్లెపూల దండలు ధరించి కనిపించారు. అంతేకాకుండా చేతులకు గోరింటాకు పెట్టుకున్న ఫోటోలను కూడా షేర్ చేశారు. ఈ ఫోటోలు చూస్తుంటే ఆమె ఇంట్లో పెళ్లి వేడుకలకు సంబంధించిన సందడి మొదలైనట్లు అభిమానులు భావిస్తున్నారు. కుటుంబ సభ్యులు, అత్యంత సన్నిహితుల మధ్య ఈ వేడుకలు ప్రారంభమైనట్లు సమాచారం. అయితే ఇవి అధికారికంగా ప్రీ వెడ్డింగ్ వేడుకల ఫోటోలేనా? వివాహానికి సంబంధించిన ఇతర కార్యక్రమాలు ఎప్పుడు జరగనున్నాయి? అనే విషయాలపై ప్రియా నుంచి స్పష్టత రావాల్సి ఉంది.

ప్రియా భవానీ శంకర్, రాజ్‌వెల్ రాజ్ ప్రేమకథ విషయానికి వస్తే.. వీరిద్దరికీ కాలేజీ రోజుల నుంచే పరిచయం ఉంది. ఆ పరిచయం కాస్తా ప్రేమగా మారడంతో అప్పటి నుంచి ఇద్దరూ ఒకరినొకరు అర్థం చేసుకుంటూ తమ బంధాన్ని కొనసాగిస్తున్నారు. దాదాపు పదేళ్లకు పైగా ప్రేమ ప్రయాణం సాగిస్తున్న ఈ జంట, తమ వ్యక్తిగత జీవితానికి సంబంధించిన విషయాలను ఎక్కువగా ప్రైవేట్‌గానే ఉంచుతూ వస్తోంది. ఇక 2022లోనే ఈ జంట కలిసి తమ కలల ఇంటిని కొనుగోలు చేయడం అప్పట్లో అభిమానుల దృష్టిని ఆకర్షించింది. అప్పటి నుంచి వీరి పెళ్లి ఎప్పుడు జరుగుతుందా అని అభిమానులు ఆసక్తిగా ఎదురుచూస్తున్నారు. ఇప్పుడు ప్రియా షేర్ చేసిన ఫోటోలతో ఆ ఎదురుచూపులకు తెరపడబోతున్నట్లు కనిపిస్తోంది. ప్రస్తుతం వినిపిస్తున్న సమాచారం ప్రకారం, ప్రియా భవానీ శంకర్ తన ప్రియుడు రాజ్‌వెల్ రాజ్‌ను కుటుంబ సభ్యులు, అత్యంత ఆత్మీయుల సమక్షంలో వివాహం చేసుకోవాలని భావిస్తున్నారట. భారీ హంగామా లేకుండా, సంప్రదాయ పద్ధతిలో ఈ వేడుకను నిర్వహించేందుకు ఇరు కుటుంబాలు సిద్ధమవుతున్నట్లు ప్రచారం జరుగుతోంది.అయితే ఇప్పటివరకు పెళ్లి తేదీ, వివాహ వేదికకు సంబంధించిన వివరాలను ఈ జంట అధికారికంగా ప్రకటించలేదు.