Warangal | ఉమ్మడి వరంగల్ జిల్లాలో అప్పుల బాధతో ఒకేరోజు ముగ్గురు రైతుల ఆత్మహత్య

Warangal | కాంగ్రెస్ ప్రభుత్వం సరిగ్గా కరెంటు సరఫరా చేయక, సరిపడా నీళ్లు ఇవ్వకపోవడంతో రాష్ట్రంలో రైతుల ఆత్మ‌హ‌త్యలు కొన‌సాగుతున్నాయి. ఉమ్మ‌డి వ‌రంగ‌ల్ జిల్లాలో ఒకే రోజు ముగ్గురు అన్న‌దాత‌లు బ‌ల‌వ‌న్మ‌ర‌ణానికి పాల్ప‌డ‌టం ప‌రిస్థితికి అద్దం ప‌డుతున్న‌ది. వరంగల్ జిల్లా నల్లబెల్లి మండలం బుజ్జు తండాలో జర్పుల వెంకటేష్ (27) అనే రైతు తనకున్న రెండెకరాల భూమిలో పత్తి సాగు చేయగా, దిగుబడి రాకపోవడంతో వ్యవసాయ బావిలో దూకి ఆత్మహత్య చేసుకున్నాడు.

జనగామ జిల్లా నర్మెట మండలం ఆగాపేటలో పత్తి సాగులో నష్టం రావడంతో మెట్ల ఉప్పలమ్మ (50) అనే మ‌హిళా రైతు పురుగుల మందు తాగి ఆత్మహత్యకు పాల్పడింది. మహబూబాబాద్ జిల్లా ఇస్లావత్ తండా పరిధిలోని వెంకట్రామ్ తండాలో తనకున్న రెండెకరాల భూమిలో వరి, మొక్కజొన్న సాగు చేయగా, ఆశించిన దిగుబడి రాక అప్పులు పెరగడంతో బానోతు రాములు (58) అనే రైతు పురుగుల మందు తాగి బ‌ల‌వ‌న్మ‌ర‌ణానికి పాల్ప‌డ్డాడు. కాంగ్రెస్ ప్ర‌భుత్వం వైఫ‌ల్యంతోనే రైతులు ఆత్మహత్యలు చేసుకుంటున్నారని విమర్శలు వెల్లువెత్తుతున్నాయి.