KTR | తెలంగాణ ప్రజల సమస్యలపై మౌనంగా ఉండి.. ఇప్పుడు రూ.100 కోట్లతో ప్రచార ఆర్భాటమా?: రాహుల్‌ గాంధీపై కేటీఆర్‌ ఫైర్‌

KTR | కాంగ్రెస్‌ అగ్రనేత రాహుల్‌ గాంధీపై బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ తీవ్ర విమర్శలు చేశారు. తెలంగాణలో ప్రజలు ఎదుర్కొంటున్న సమస్యలపై స్పందించకుండా మౌనంగా ఉండి.. ఇప్పుడు రూ.100 కోట్ల ప్రజాధనంతో ప్రచార కార్యక్రమం కోసం రాష్ట్రానికి వస్తున్నారని మండిపడ్డారు. ఈ మేరకు శుక్రవారం ఎక్స్‌ వేదికగా రాహుల్‌ గాంధీని ఉద్దేశించి ఘాటు వ్యాఖ్యలు చేశారు.

ఉద్యోగాలు ఇస్తామని హామీ ఇచ్చి అధికారంలోకి వచ్చిన కాంగ్రెస్‌.. ఉద్యోగాల కోసం ఆందోళన చేస్తున్న విద్యార్థులపై పోలీసులతో దాడులు చేయించినప్పుడు రాహుల్‌ ఎక్కడున్నారని కేటీఆర్‌ ప్రశ్నించారు. లగచర్లలో భూముల కోసం పోరాడిన గిరిజన మహిళలను కొట్టి, దుస్తులు తొలగించి, వేధించిన ఘటనలపై కూడా ఆయన స్పందించలేదని ఆరోపించారు. హైడ్రా బుల్డోజర్లతో కష్టపడి సంపాదించుకున్న ఇళ్లను కూల్చివేస్తున్నప్పుడు రాహుల్‌ ఢిల్లీలో నిద్రపోతున్నారని విమర్శించారు.

కంచ గచ్చిబౌలి హెచ్‌సీయూ భూముల్లో ఒక్క రాత్రిలోనే 10 వేలకుపైగా చెట్లను నరికివేసి, జింకలు, నెమళ్లు సహా జీవవైవిధ్యాన్ని ధ్వంసం చేసినప్పుడు.. కేబీఆర్‌ పార్కును నాశనం చేస్తున్నప్పుడు కూడా ఆయనకు స్పందించే సమయం లేకపోయిందని కేటీఆర్‌ పేర్కొన్నారు. రాజ్యాంగ ప్రక్రియలను అపహాస్యం చేస్తూ బీఆర్‌ఎస్‌కు చెందిన 10 మంది ఎమ్మెల్యేలను కాంగ్రెస్‌లో చేర్చుకున్నప్పుడు కూడా రాహుల్‌ మాట్లాడలేదని విమర్శించారు.

అసెంబ్లీ ఎదుట మహిళా ఎమ్మెల్యేల చీరలు లాగి, వారిపై దాడి చేసిన ఘటనపై రాహుల్‌ గాంధీ ఎందుకు స్పందించలేదని ప్రశ్నించారు. రైతుల ఆత్మహత్యలు, నేత కార్మికుల బలవన్మరణాలు, అర్ధరాత్రి వేళ జర్నలిస్టుల అరెస్టులు, కార్పొరేట్‌ అనుకూల విధానాలు, భూకబ్జాల అంశాలపైనా ఆయన మౌనంగా ఉన్నారని ఆరోపించారు. కాంగ్రెస్‌ ప్రభుత్వంలోని సొంత ఎమ్మెల్యేలు, మంత్రులే బహిరంగంగా అవినీతి గురించి మాట్లాడుతున్నారని వ్యాఖ్యానించారు.

అవసరమైన సమయంలో గొంతు విప్పకుండా మౌనంగా ఉన్న రాహుల్‌ గాంధీ.. ఇప్పుడు తెలంగాణ ప్రజల సొమ్ము రూ.100 కోట్లతో ప్రచార స్టంట్‌ కోసం సిగ్గులేకుండా వస్తున్నారని కేటీఆర్‌ విమర్శించారు. రాహుల్‌ గాంధీని ఉద్దేశించి ‘ఇప్పుడు మీకు ఏం హక్కు ఉంది?’ అంటూ ప్రశ్నించారు. తన పోస్టుకు #CongressFailedTelangana అనే హ్యాష్‌ట్యాగ్‌ను జత చేశారు.