Crude oil tanker hit | యూఏఈ తీరంలో చమురు ట్యాంకర్‌పై దాడి.. 19 మంది భారతీయ నావికులు సురక్షితం

న్యూఢిల్లీ: యూనైటెడ్‌ అరబ్‌ ఎమిరేట్స్‌ (యూఏఈ) సముద్ర తీరంలో ఒక చమురు ట్యాంకర్‌పై క్షిపణి దాడి జరిగింది. అయితే అందులో ఉన్న 19 మంది భారతీయ నావికులతో సహా మొత్తం 22 మంది సిబ్బందిని
యూఏఈ కోస్ట్ గార్డ్ సురక్షితంగా రక్షించింది. కేంద్ర ఓడరేవులు, నౌకాయానం, జలమార్గాల శాఖ మంత్రిత్వ శాఖ ఈ విషయాన్ని తెలిపింది. (Crude oil tanker hit) బుధవారం యూఏఈలోని మినా సాకర్ సమీపంలో లైబీరియా జెండాతో ప్రయాణిస్తున్న ముడి చమురు ట్యాంకర్‌పై క్షిపణి దాడి జరిగినట్లు ఆ శాఖల కేంద్ర మంత్రి సర్బానంద సోనోవాల్ తెలిపారు. కొట్టుకుపోతున్న ‘ఎంటీ డొమినికా ప్రాస్పెరిటీ’ అనే ఆయిల్‌ ట్యాంకర్‌లోని 19 మంది భారతీయులతో సహా 22 మంది సిబ్బందిని యూఏఈ కోస్ట్ గార్డ్ సిబ్బంది రక్షించినట్లు చెప్పారు. వారందరినీ సురక్షిత ప్రాంతానికి తరలించినట్లు వివరించారు.

కాగా, నవంబర్ 11న హార్ముజ్ జలసంధి గుండా ప్రయాణించిన సౌదీ అరేబియా జెండా కలిగిన చమురు ట్యాంకర్‌ కూడా దాడి ముప్పును ఎదుర్కొన్నదని కేంద్ర మంత్రి సర్బానంద సోనోవాల్ తెలిపారు. అయితే అందులోని ముగ్గురు భారతీయ నావికులతో సహా సిబ్బంది అంతా సురక్షితంగా ఉన్నట్లు వివరించారు.

మరోవైపు భారత నావికుల భద్రత, అవసరమైన సహాయాన్ని అందించడానికి కేంద్ర ప్రభుత్వం షిప్ మేనేజ్‌మెంట్ కంపెనీతో సమన్వయం చేసుకుంటోందని కేంద్ర మంత్రి సర్బానంద సోనోవాల్ తెలిపారు. అక్కడి పరిస్థితిని నిరంతరం పర్యవేక్షిస్తున్నట్లు వెల్లడించారు.