Man pushed Woman Under train | రైలులో మహిళను వేధించిన వ్యక్తి.. అతడు తోయడంతో రైలు కిందపడి చేయి కోల్పోయిన యువతి

12 November 2026 - 19:00
0 0
Man pushed Woman Under train | రైలులో మహిళను వేధించిన వ్యక్తి.. అతడు తోయడంతో రైలు కిందపడి చేయి కోల్పోయిన యువతి
Man Pushed Woman From Train

ముంబై: లోకల్‌ ట్రైన్‌లో ప్రయాణించిన మహిళను ఒక వ్యక్తి వేధించాడు. ఒక స్టేషన్‌లో రైలు దిగిన ఆమె అతడిని ప్రతిఘటించింది. వాగ్వాదం సందర్భంగా ఆ వ్యక్తి యువతిని తోయడంతో రైలు కింద పడింది. లోకల్‌ ట్రైన్‌ అప్పుడే కదలడంతో ఆమె చేయి తెగిపోయింది. (Man pushed Woman Under train) మహారాష్ట్రలోని పాల్‌గఢ్‌ జిల్లాలో ఈ సంఘటన జరిగింది. నవంబర్‌ 4న సాయంత్రం వేళ ఒక యువతి గోరేగావ్‌లో ఉన్న తన సోదరిని కలిసింది. నైగావ్ ఈస్ట్‌లోని తన ఇంటికి వెళ్లేందుకు లోకల్‌ ట్రైన్‌లో ఆమె ప్రయాణించింది.

కాగా, లోకల్‌ ట్రైన్‌లో ఒక వ్యక్తి ఆ యువతిని వేధించేందుకు ప్రయత్నించాడు. సాయంత్రం 7:15 గంటల సమయంలో నైగావ్ రైల్వే స్టేషన్‌లో రైలు దిగిన తర్వాత వారిద్దరి మధ్య దీని గురించి వాగ్వాదం జరిగింది. ఈ నేపథ్యంలో ఆ యువతి తన చెప్పును అతడిపైకి విసిరింది. ప్రతిగా ఆ వ్యక్తి కూడా తన చెప్పును ఆమెపైకి విసిరాడు. అలాగే ఆ యువతిని బలంగా రైలు పట్టాల వైపు తోశాడు.

మరోవైపు అదుపుతప్పిన ఆ యువతి, రెండు బోగీల మధ్య ఉన్న ఖాళీ నుంచి పట్టాలలోకి పడింది. ఆమె తిరిగి ప్లాట్‌ఫారమ్‌పైకి ఎక్కలేకపోయింది. ఆ లోకల్‌ ట్రైన్‌ అప్పుడే కదలడంతో ఆ యువతి ఎడమ చేయి తెగిపోయింది. ఆమె తలకు కూడా గాయాలయ్యాయి. ఆ యువతిని వెంటనే ఆసుపత్రికి తరలించి చికిత్స అందిస్తున్నారు.

రైల్వే పోలీసులు ఈ సంఘటనపై దర్యాప్తు చేపట్టారు. నిందితుడిని గుర్తించేందుకు ఆ రైల్వే స్టేషన్‌తో పాటు పలు ప్రాంతాల్లోని సీసీటీవీ ఫుటేజీని పరిశీలించారు. చివరకు నవంబర్ 9న ఆ వ్యక్తిని గుర్తించి అరెస్ట్‌ చేసినట్లు రైల్వే పోలీస్‌ అధికారి తెలిపారు. అతడిపై పలు సెక్షన్ల కింద కేసు నమోదు చేసి దర్యాప్తు చేస్తున్నట్లు వెల్లడించారు.

 

Comments (0)

User