KTR | కేటీఆర్ చేతుల మీదుగా ‘ఏఐ కెన్ రైట్ ద కోడ్’ పుస్తకావిష్కరణ.. యువ ఇంజినీర్లకు నూతన దిశానిర్దేశం!

21 November 2026 - 16:30
0 0
KTR | కేటీఆర్ చేతుల మీదుగా ‘ఏఐ కెన్ రైట్ ద కోడ్’ పుస్తకావిష్కరణ.. యువ ఇంజినీర్లకు నూతన దిశానిర్దేశం!
Ai Can Code

కృత్రిమ మేధ (ఏఐ) సాంకేతికత వేగంగా విస్తరిస్తున్న ప్రస్తుత తరుణంలో, భవిష్యత్తులో ఇంజినీర్లకు అందుబాటులోకి రానున్న కొత్త ఉద్యోగ అవకాశాలు, అవసరమైన నైపుణ్యాలను వివరిస్తూ రూపొందించిన ‘ఏఐ కెన్ రైట్ ద కోడ్: హూ గెట్స్ ఇట్ ఇంటు ప్రొడక్షన్?’ పుస్తకాన్ని బీఆర్ఎస్ వర్కింగ్ ప్రెసిడెంట్, ఎమ్మెల్యే కేటీఆర్ హైదరాబాద్‌లో ఆవిష్కరించారు. నగరానికి చెందిన ప్రముఖ సాంకేతిక నిపుణుడు, సీ3ఆప్స్ టెక్నాలజీస్ ప్రైవేట్ లిమిటెడ్ సహ వ్యవస్థాపకుడు చెన్నకేశవులు కుమ్మరి ఈ పుస్తకాన్ని రచించారు. ఏఐ సాధనాలు క్షణాల్లో సాఫ్ట్‌వేర్ కోడ్ రాయగలుగుతున్న పరిస్థితుల్లో ఇంజినీర్ల అసలైన బాధ్యత ఏమిటనే అంశానికి ఈ పుస్తకం స్పష్టమైన సమాధానం ఇస్తుంది. కేవలం కోడ్ రాయడం కంటే, ఏఐ వ్యవస్థలను వాస్తవ వ్యాపార అవసరాలకు అనుగుణంగా తీర్చిదిద్దడం, సంస్థల డేటాతో అనుసంధానించడం, భద్రతా ప్రమాణాలు పాటిస్తూ తక్కువ వ్యయంతో సమర్థంగా పనిచేసేలా వినియోగంలోకి తీసుకురావడం అత్యంత కీలకమని రచయిత ఇందులో వివరించారు.

ఈ క్రమంలో కొత్తగా ప్రాధాన్యత సంతరించుకుంటున్న ‘ఏఐ ఫార్వర్డ్ డిప్లాయ్డ్ ఇంజినీర్’ (ఎఫ్‌డీఈ) ఉద్యోగ పాత్రను ఈ పుస్తకం పరిచయం చేస్తోంది. వ్యాపార సంస్థలతో నేరుగా పనిచేస్తూ వాటి అవసరాలకు తగ్గట్టుగా ఏఐ వ్యవస్థలను అభివృద్ధి చేసి, సురక్షితంగా అమలయ్యే వరకు బాధ్యత వహించే ఇంజినీర్లకు భవిష్యత్తులో విస్తృత అవకాశాలు ఉంటాయని పేర్కొంది. మొత్తం 24 అధ్యాయాలుగా సాగే ఈ పుస్తకంలో ఏఐ రిట్రీవల్ సిస్టమ్స్, ఏఐ ఏజెంట్లు, భద్రత, డిప్లాయ్‌మెంట్, ఉద్యోగ అవకాశాల వంటి అంశాలను భారతీయ పరిశ్రమల ఉదాహరణలతో విశ్లేషించారు. సాఫ్ట్‌వేర్, క్లౌడ్, డెవాప్స్ ఇంజినీర్లతో పాటు ఏఐ రంగంలోకి అడుగుపెట్టాలనుకునే విద్యార్థులు, ఫ్రెషర్లు, సాంకేతిక సంస్థల నాయకులకు ఇది ఎంతగానో ఉపయోగపడనుంది. తన పుస్తకాన్ని ఆవిష్కరించి యువ ఇంజినీర్లను ప్రోత్సహించిన కేటీఆర్‌కు చెన్నకేశవులు కుమ్మరి కృతజ్ఞతలు తెలిపారు.

మరోవైపు కేశవ్ రచించిన రెండో పుస్తకం ‘యూజ్ ఏఐ, స్టే రిలెవెంట్: హౌ టు థింక్, వర్క్, అండ్ థ్రైవ్ ఇన్ ద ఏజ్ ఆఫ్ ఆర్టిఫిషియల్ ఇంటెలిజెన్స్’ కూడా త్వరలోనే విడుదల కానుంది. కేవలం ఇంజినీర్లకే పరిమితం కాకుండా విద్యార్థులు, ఉద్యోగులు, ఐటీ నిపుణులు, వ్యాపారవేత్తలు సహా అన్ని వర్గాల వారికి ఉపయోగపడేలా సులభమైన భాషలో దీనిని రూపొందించారు. భారతీయ కార్యాలయాల అనుభవాలు, సిద్ధంగా ఉపయోగించుకోగల ప్రాంప్ట్‌లు, 90 రోజుల కార్యాచరణ ప్రణాళిక ద్వారా రోజువారీ పనుల్లో ఏఐని ఎలా సమర్థంగా వినియోగించుకోవాలో ఈ రెండో పుస్తకం వివరిస్తుంది. ఈ రెండు పుస్తకాలు పేపర్‌బ్యాక్, కిండిల్ రూపాల్లో అందుబాటులోకి రానున్నాయని, మరిన్ని వివరాల కోసం ఇన్‌స్టాగ్రామ్‌లో @kesavkummari ఖాతా ద్వారా సంప్రదించవచ్చని రచయిత వెల్లడించారు.

Comments (0)

User