Kamal Haasan | టైటిల్‌ వివాదంలో ‘సండియర్‌’.. గ‌తంలో విరుమాండి’గా పేరు మార్పు..!
అగ్ర కథానాయకుడు కమల్‌హాసన్‌ నటిస్తున్న తాజా చిత్రం ‘సండియర్‌’ వివాదంలో చిక్కుకుంది. ఈ సినిమా టైటిల్‌ మార్చాలని పుతియా తమిళగం పార్టీ అధ్యక్షుడు కె.కృష్ణస్వామి డిమాండ్‌ చేస్తున్నారు. ఈ టైటిల్‌ దక్షిణ తమిళనాడులో కులపరమైన ఉద్రిక్తతలకు, సామాజిక సంఘర్షణలకు కారణమయ్యే అవకాశం ఉందని ఆయన ఆందోళన వ్యక్తం చేశారు. అయితే ‘సండియర్‌’ టైటిల్‌ వివాదం కొత్తదేమీ కాదు. కమల్‌హాసన్‌ నటించిన ‘విరుమాండి’ (2004) చిత్రానికి తొలుత ‘సండియర్‌’ అనే టైటిల్‌ను ఖరారు చేశారు. టైటిల్‌పై తీవ్ర వివాదం చెలరేగడంతో ‘విరుమాండి’గా పేరు మార్చారు.
మళ్లీ ఆదే టైటిల్‌ను కమల్‌హాసన్‌ ఉపయోగించడంతో వివాదం మొదటికొచ్చింది. ఇటీవల విడుదల చేసిన కమల్‌హాసన్‌ ఫస్ట్‌లుక్‌ పోస్టర్‌పై ‘ప్రతీకారానికి రక్తపాతమే పరిష్కారం’ అనే అర్థం వచ్చే ట్యాగ్‌లైన్‌ కూడా వివాదానికి కారణమైంది. ఈ క్యాప్షన్‌ హింసను ప్రోత్సహించేలా ఉందని విమర్శలొస్తున్నాయి. తాజా వివాదం నేపథ్యంలో టైటిల్‌పై కమల్‌హాసన్‌ ఎలాంటి నిర్ణయం తీసుకుంటారన్నది తమిళనాట ఆసక్తికరంగా మారింది. ఈ చిత్రానికి ఎస్‌.యూ.అరుణ్‌కుమార్‌ దర్శకత్వం వహిస్తున్నారు.
Comments (0)