Kajal Aggarwal | వెంట్రుకవాసిలో తప్పిన మృత్యువు.. 100 అడుగుల క్రేన్ కూలిన వేళ ఏం జరిగిందో చెప్పిన కాజల్ అగర్వాల్!

Kajal Aggarwal | దాదాపు రెండు దశాబ్దాలుగా దక్షిణాది, ఉత్తరాది ప్రేక్షకులను తన అందం, అభినయంతో అలరిస్తున్న స్టార్ హీరోయిన్ కాజల్ అగర్వాల్. తెలుగు, తమిళం, హిందీ భాషల్లో ఎన్నో విజయవంతమైన చిత్రాల్లో నటించి తనకంటూ ప్రత్యేక గుర్తింపు సంపాదించుకున్న ఈ ముద్దుగుమ్మ, ఇప్పటికీ వరుస సినిమాలతో బిజీగా ఉన్నారు. ఇటీవల విడుదలై బాక్సాఫీస్ వద్ద భారీ విజయాన్ని అందుకుంటున్న ‘రామాయణ’ చిత్రంలో రావణుడి భార్య మండోదరి పాత్రలో కనిపించి ప్రేక్షకుల ప్రశంసలు అందుకుంటున్నారు. ఈ క్రమంలో తాజాగా ఓ ఇంటర్వ్యూలో తన జీవితంలో ఎదురైన అత్యంత భయానక సంఘటనను గుర్తుచేసుకుని భావోద్వేగానికి గురయ్యారు. సుమారు ఆరేళ్ల క్రితం జరిగిన క్రేన్ ప్రమాదంలో తాను తృటిలో ప్రాణాలతో బయటపడిన విషయాన్ని వెల్లడించారు.

2020లో ప్రముఖ దర్శకుడు శంకర్ తెరకెక్కిస్తున్న ‘ఇండియన్ 2’ సినిమా షూటింగ్ సమయంలో జరిగిన ఘోర ప్రమాదం అప్పట్లో చిత్ర పరిశ్రమను తీవ్ర దిగ్భ్రాంతికి గురిచేసింది. చెన్నైలోని ఈవీపీ ఫిల్మ్ సిటీలో చిత్రీకరణ జరుగుతుండగా భారీ క్రేన్ ఒక్కసారిగా కుప్పకూలింది. ఈ ప్రమాదంలో ముగ్గురు సిబ్బంది ప్రాణాలు కోల్పోగా, పలువురు తీవ్రంగా గాయపడ్డారు. ఆ సమయంలో సెట్‌లోనే ఉన్న కాజల్ అగర్వాల్ కూడా తృటిలో ప్రమాదం నుంచి తప్పించుకున్నారు. తాజా ఇంటర్వ్యూలో ఆ ఘటనను గుర్తుచేసుకున్న కాజల్.. తన జీవితంలో అదొక ఎప్పటికీ మర్చిపోలేని పీడకల అని పేర్కొన్నారు. ఆరోజు సినిమాలో ఓ కీలకమైన యాక్షన్ సన్నివేశాన్ని చిత్రీకరిస్తున్నారని, తాను 80 ఏళ్ల వృద్ధురాలి పాత్ర కోసం ప్రత్యేక ప్రోస్థెటిక్ మేకప్ వేసుకున్నానని తెలిపారు. షూటింగ్ సెట్‌లోని మానిటర్ వద్ద కూర్చుని ఉండగా ఒక్కసారిగా భారీ శబ్దం, ఆర్తనాదాలు వినిపించాయని చెప్పారు.

ఏం జరిగిందో అర్థం చేసుకునేలోపే సుమారు 100 అడుగుల ఎత్తున్న భారీ క్రేన్ కుప్పకూలిందని కాజల్ గుర్తుచేసుకున్నారు. ఆ సమయంలో సెట్‌లో ఉన్నవారంతా ప్రాణభయంతో పరుగులు తీశారని తెలిపారు. తాను కూడా అక్కడి నుంచి తప్పించుకునే ప్రయత్నంలో ఓ టేబుల్‌ను బలంగా ఢీకొని కిందపడిపోయానని వెల్లడించారు. అయితే ఆ భారీ క్రేన్ తనవైపే కూలాల్సి ఉందని, కేవలం కొన్ని సెకన్ల వ్యవధిలోనే తాను పెను ప్రమాదం నుంచి బయటపడ్డానని కాజల్ తెలిపారు. ఆ సమయంలో ఏం జరిగిందో, ఎలా ప్రాణాలతో బయటపడ్డానో తనకు ఇప్పటికీ ఆశ్చర్యంగానే ఉంటుందని భావోద్వేగానికి గురయ్యారు. ఆ ఘటన తన జీవితంలో అత్యంత భయానకమైన అనుభవమని చెప్పారు.

ఈ సందర్భంగా మరో ఆసక్తికరమైన విషయాన్ని కూడా కాజల్ పంచుకున్నారు. ప్రమాదం జరగడానికి సరిగ్గా వారం రోజుల ముందే సింగపూర్‌లోని ప్రముఖ మేడమ్ టుస్సాడ్స్ మ్యూజియంలో తన మైనపు విగ్రహాన్ని ఆవిష్కరించుకున్నానని తెలిపారు. ఒక నటిగా తన కెరీర్‌లో అదొక గొప్ప మైలురాయి అని, ఆ ఆనందంలో ఉన్న సమయంలోనే ఇలాంటి ఘోర ప్రమాదాన్ని ఎదుర్కోవాల్సి వచ్చిందని గుర్తుచేసుకున్నారు. ఒకవైపు కెరీర్‌లో అరుదైన గౌరవం దక్కిన సంతోషం, మరోవైపు కళ్లముందే మృత్యువు కనిపించినంతటి భయంకరమైన అనుభవం.. ఈ రెండింటి మధ్య కేవలం వారం రోజుల వ్యవధి ఉండటం తనను తీవ్రంగా కలిచివేసిందని చెప్పారు. ఆ ప్రమాదం నుంచి ఎలాంటి పెద్ద గాయాలు కాకుండా బయటపడటం తనకు పునర్జన్మ లాంటిదని పేర్కొన్నారు.