Wildlife Protect | వన్యప్రాణులను కాపాడుకోవడం అందరి బాధ్యత

అచ్చంపేట: వన్యప్రాణులను కాపాడుకోవడం (Wildlife Protect ) అందరి బాధ్యత అని ఫారెస్ట్ బీట్ ఆఫీసర్ హనుమంతు ( Hanmanth Naik ) నాయక్ అన్నారు. సోషల్ వెల్ఫేర్ రెసిడెన్షియల్ స్కూల్‌లో విద్యార్థులకు వన్యప్రాణుల సంరక్షణ, అటవీ పరిరక్షణ, పర్యావరణ ప్రాముఖ్యతపై అవగాహన కల్పించేందుకు ప్రత్యేక వైల్డ్‌లైఫ్ అవేర్‌నెస్ ( Wildlife Awareness ) కార్యక్రమాన్ని నిర్వహించారు.

ఈ సందర్భంగా విద్యార్థులకు అడవుల ప్రాముఖ్యత, వన్యప్రాణుల జీవన విధానం, జీవవైవిధ్య పరిరక్షణ, వన్యప్రాణుల ఆవాసాల సంరక్షణ, మానవ–వన్యప్రాణుల మధ్య సంఘర్షణ నివారణ వంటి అంశాలపై వివరించారు. ప్రకృతిలో ప్రతి జీవికి ప్రత్యేకమైన ప్రాముఖ్యత ఉందని తెలిపారు. చిన్న వయస్సు నుంచే విద్యార్థుల్లో ప్రకృతిపై ప్రేమ, పర్యావరణ పరిరక్షణ పట్ల బాధ్యతను పెంపొందించాలని సూచించారు.

అపోలో ఫౌండేషన్ ఆధ్వర్యంలో విద్యార్థుల ఆరోగ్య పరిరక్షణ కోసం ఉచిత వైద్య శిబిరాన్ని నిర్వహించారు. వైద్యులు విద్యార్థులకు ఆరోగ్య పరీక్షలు నిర్వహించి అవసరమైన వైద్య సలహాలు అందించడంతో పాటు ఉచితంగా మందులు పంపిణీ చేశారు. విద్యతో పాటు ఆరోగ్యం, పర్యావరణం, వన్యప్రాణుల సంరక్షణపై అవగాహన కల్పించడమే ఈ కార్యక్రమ ముఖ్య ఉద్దేశమని నిర్వాహకులు తెలిపారు.ఈ కార్యక్రమంలో డాక్టర్ రాజశేఖర్, ఫారెస్ట్ బీట్ ఆఫీసర్ హనుమంతు నాయక్, అపోలో ఫౌండేషన్ వైద్య బృందం,పాఠశాల ప్రిన్సిపాల్, ఉపాధ్యాయులు, విద్యార్థులు పాల్గొన్నారు.