Itllu Arjuna | అనీష్‌ ‘ఇట్లు అర్జున’ రివ్యూ.. కొత్త పోరడు హిట్ కొట్టాడా?

కొత్త హీరో అనీష్ నటించిన ‘ఇట్లు అర్జున’ ఈ మధ్యకాలంలో పరిశ్రమ దృష్టిని ఆకర్షించిన సినిమా. నాగార్జున లాంటి అగ్ర కథానాయకుడు సమర్పకుడిగా మారడం, దర్శకుడు వెంకీ కుడుముల ఈ చిత్రానికి నిర్మాతగా వ్యవహరించడం, రామ్ చరణ్, ఎన్టీఆర్ లాంటి స్టార్లు కూడా ప్రమోషన్లలో భాగం పంచుకోవడంతో సినిమాపై క్రేజ్ పెరుగుతూ వచ్చింది. మరి ఈ హైప్‌ను సినిమా అందుకుందా? కొత్త హీరో అనీష్ నటన ఎలా ఉంది? రివ్యూలో చూద్దాం.

కథ:
అర్జున్ (అనీష్)కు మాటలు రావు. కానీ చాలా స్మార్ట్. చిన్నప్పుడు కొన్ని దొంగతనాలు చేయడంతో అతనిపై దొంగ అనే ముద్ర పడిపోతుంది. కీర్తి (అనస్వర రాజన్) అంటే అర్జున్‌కు ప్రాణం. తన మనసులోని ఫీలింగ్‌ను ఎలాగైనా సరే ఆమెకు చెప్పాలనుకుంటాడు. ఇదే సమయంలో పెద్దన్న (ముఖేష్ రుషి)కి సంబంధించిన వెయ్యి కోట్ల వ్యవహారంలో కీర్తి, అర్జున్ ఇద్దరూ అనుకోకుండా పాత్రధారులైపోతారు. ఆ తర్వాత ఏం జరిగింది? అర్జున్ తన మనసులోని మాటను కీర్తికి చెప్పగలిగాడా? ఈ హవాలా వ్యవహారానికి అర్జున్‌కు ఉన్న సంబంధం ఏమిటి? అనేదే మిగతా కథ.

విశ్లేషణ:
పాత కథను కొత్తగా చెప్పడం మంచి టెక్నిక్. అనుకోకుండా ఓ క్రైమ్‌లో హీరో చిక్కుకోవడం పాత పాయింటే. కాకపోతే ఈ పాయింట్‌కు హీరో మూగవాడు కావడం, అతని తెలివితేటలు, హవాలా నేపథ్యం, అడ్వెంచర్ అంశాలు కొత్తదనాన్ని తీసుకొచ్చాయి. తొలి సీన్‌లోనే వెయ్యి కోట్ల వ్యవహారాన్ని తెరపైకి తీసుకురావడం, హీరోను దొంగగా పరిచయం చేయడం, ప్రేమకథ.. ఇలా అన్నీ చకచకా సాగిపోతుంటాయి. ముఖ్యంగా హవాలా ఎపిసోడ్ ఆకట్టుకుంటుంది. సెకండాఫ్ కథ కూడా వెయ్యి కోట్ల వ్యవహారం చుట్టూనే తిరుగుతుంది. కాకపోతే విరామంలోనే కథ రివీల్ కావడంతో ఆ తర్వాత వచ్చే సన్నివేశాలు ప్రేక్షకుల ఊహకు అందిపోతాయి. పెన్‌డ్రైవ్, పాస్‌వర్డ్, టైమ్‌లైన్ చుట్టూ తిరిగే సన్నివేశాల్లో జోరు తగ్గింది. అయితే చివర్లో లవ్‌స్టోరీని నడిపించిన తీరు, హీరో తెలివితేటలను దర్శకుడు కొత్తగా రాసుకున్న విధానం బాగుంది.

నటీనటుల నటన:
తొలి సినిమాతోనే మూగవాడి పాత్ర పోషించడం అంత తేలికైన విషయం కాదు. అనీష్‌కు ఈ విషయంలో మంచి మార్కులు పడతాయి. తన యాక్షన్, డ్యాన్సులు బాగున్నాయి. తన స్క్రీన్ ప్రెజెన్స్ కూడా ప్రామిసింగ్‌గా ఉంది. అనస్వర పాత్ర చలాకీగా ఉంది. ప్రేమకథ కూడా సినిమాలో కొత్తదనాన్ని జోడించింది. ముఖేష్ రుషి ట్రాక్‌ను ఇంకాస్త కొత్తగా రాసుకోవాల్సింది. వెన్నెల కిశోర్, బ్రహ్మాజీ తమ కామెడీతో నవ్వులు పంచారు.

టెక్నికల్‌గా ఎలా ఉంది?
తమన్ పాటలు ఈ సినిమాకు ప్రధాన ఆకర్షణ. బ్యాక్‌గ్రౌండ్ స్కోర్ కూడా సన్నివేశాలను ఎలివేట్ చేసింది. ఫొటోగ్రఫీ, ఆర్ట్, ప్రొడక్షన్ డిజైనింగ్‌లో నాణ్యత కనిపించింది. వెంకీ కుడుముల నిర్మాతగా మంచి కథనే ఎంచుకున్నారు. క్లీన్ ఎంటర్‌టైన్‌మెంట్ కావడం ఈ సినిమాకు మరో బలం.

ప్లస్ పాయింట్స్:
అనీష్, అనస్వర జోడీ
కథలో మలుపులు
యాక్షన్, మ్యూజిక్

మైనస్ పాయింట్స్:
సెకండాఫ్‌లో కొన్ని సన్నివేశాలు

ఫైనల్ పంచ్: కొత్త పోరడు ఆకట్టుకున్నాడు.

రేటింగ్: 3/5