AP News | పరిషత్ ఎన్నికల్లో గొడ్డలి పార్టీ 6 శాతానికిపైగా ఓట్లు కోల్పోయింది : చంద్రబాబు

AP News : స్థానిక సంస్థల ఎన్నికల్లో కూటమి అభ్యర్థులను గెలిపించిన ప్రజలందరికీ ఏపీ ముఖ్యమంత్రి నారా చంద్రబాబు నాయుడు ధన్యవాదాలు తెలిపారు. మున్సిపల్ ఎన్నికల తర్వాత పరిషత్ ఎన్నికల్లో కూడా ప్రజలు అద్భుత ఫలితాలు ఇచ్చారని పేర్కొన్నారు. తమ రెండున్నరేళ్ల పరిపాలన భేష్ అంటూ ప్రజలిచ్చిన తీర్పుగా ఈ విజయాన్ని భావిస్తున్నామని చెప్పారు. మంగళగిరిలోని టీడీపీ హెడ్ ఆఫీస్లో చంద్రబాబు మీడియాతో మాట్లాడారు.
ఈవీఎంలు, బ్యాలెట్లు, పోస్టల్ బ్యాలెట్లు.. ఎన్నిక ఏ రీతిన జరిగినా విజయం కూటమి పార్టీలదేనని చంద్రబాబు చెప్పారు. మున్సిపల్ ఎన్నికల్లో 94 శాతం స్ట్రైక్ రేట్ సాధించిన తమకు, పరిషత్ ఎన్నికల్లో అంతకుమించిన ఫలితం వచ్చిందన్నారు. ఈ ఎన్నికల్లో తాము 96.4 శాతం స్ట్రైక్ రేట్తో గెలిచామని చెప్పారు. సార్వత్రిక ఎన్నికలతో పోలిస్తే స్థానిక ఎన్నికల్లో 3.6 శాతం ఓట్లు పెరిగాయన్నారు.
గొడ్డలి పార్టీకి గతంలో 39.8 శాతం ఓట్లు పాలయ్యాయని, ఇప్పుడు అందులో నుంచి 6 శాతానికిపైగా ఓట్లను ఆ పార్టీ కోల్పోయిందని బాబు అన్నారు. కూటమి పార్టీల మధ్య సీట్ల సర్దుబాటుపై చాలా శ్రద్ధ పెట్టామని చెప్పారు. అన్ని అంశాలు పరిగణనలోకి తీసుకుని అభ్యర్థులను ఎంపిక చేశామని అన్నారు. ఈ ఎన్నికల కోసం తాము ప్రత్యేకంగా వార్రూమ్ ఏర్పాటు చేశామని ఆయన వెల్లడించారు.
Comments (0)