‘9+12 విద్యా విధానంతో డ్రాప్ అవుట్లకు చెక్’

– బాలల హక్కుల పరిరక్షణ వేదిక కార్యదర్శి చింతల లక్ష్మీనారాయణ
బీబీనగర్, నవంబర్ 21 : రాష్ర్ట ప్రభుత్వం విద్యా విధానంలో తీసుకున్న నిర్ణయాన్ని బాలల హక్కుల పరిరక్షణ వేదిక కార్యదర్శి చింతల లక్ష్మీనారాయణ స్వాగతించారు. దేశంలోని నాలుగు రాష్ట్రాలు మినహా మిగతా రాష్ట్రాల్లో ఈ విధానం అమలవుతోందని తెలిపారు. తెలంగాణలోనూ 9+12 విద్యా విధానాన్ని సమర్థవంతంగా అమలు చేయాలని కోరారు. ప్రతి మండలంలో కనీసం నాలుగు పాఠశాలల్లో సీనియర్ సెకండరీ విద్యను అందుబాటులోకి తీసుకురావాలని సూచించారు. ఈ విధానం అమలుతో ప్రభుత్వ పాఠశాలల్లో విద్యార్థుల డ్రాప్ అవుట్లు తగ్గడంతో పాటు పేద కుటుంబాల పిల్లలు, ముఖ్యంగా బాలికలు ఉన్నత విద్యను కొనసాగించేందుకు అవకాశం ఉంటుందని పేర్కొన్నారు. ప్రైవేట్ పాఠశాలలు, కళాశాలల్లో ఫీజుల దోపిడీని అరికట్టేందుకు ఫీజుల వివరాలను తప్పనిసరిగా ప్రదర్శించేలా చర్యలు తీసుకోవాలని డిమాండ్ చేశారు.
నర్సరీ నుండి నాలుగో తరగతి వరకు ప్రాథమిక విద్య, ఐదు నుండి ఎనిమిదో తరగతి వరకు సెకండరీ విద్య, తొమ్మిది నుండి పన్నెండో తరగతి వరకు సీనియర్ సెకండరీ విద్యను అమలు చేయాలని వివరించారు. అయితే, కొత్త విద్యా విధానాన్ని అమలు చేసే ముందు ప్రభుత్వ పాఠశాలల్లో అవసరమైన మౌలిక వసతులు కల్పించి, సరిపడా ఉపాధ్యాయులను నియమించాలని కోరారు. రాష్ర్ట ప్రభుత్వం ప్రవేశ పెడుతున్న క్యూఆర్ బిల్లులో జనాభా ప్రాతిపదికన కొత్త ప్రభుత్వ పాఠశాలలను ఏర్పాటు చేయాలని సూచించారు. విద్యారంగానికి ఎన్నికల హామీ మేరకు 15 శాతం బడ్జెట్ కేటాయించాలని, ప్రస్తుతం ఉన్న పాఠశాలల్లో విద్యార్థుల సంఖ్యకు అనుగుణంగా ఉపాధ్యాయులను నియమించి, అవసరమైన మౌలిక వసతులు కల్పించాలని ఆయన కోరారు.
Comments (0)