Anna Lezhneva | పవన్ కళ్యాణ్- అన్నా లెజినోవా వైవాహిక బంధంపై చర్చ.. ఆమె ఆస్తులు రూ.1,800 కోట్లా..!

Anna Lezhneva | ఆంధ్రప్రదేశ్ ఉప ముఖ్యమంత్రి, జనసేన అధినేత, పవర్ స్టార్ పవన్ కళ్యాణ్ వ్యక్తిగత జీవితానికి సంబంధించిన ఓ వార్త ప్రస్తుతం సోషల్ మీడియాలో చర్చనీయాంశంగా మారింది. పవన్ కళ్యాణ్, ఆయన భార్య అన్నా లెజినోవా తమ 13 ఏళ్ల వైవాహిక బంధానికి ముగింపు ప‌లికిన విష‌యం తెలిసిందే. పరస్పర అంగీకారం, గౌరవంతో విడిపోవాలని తాము నిర్ణ‌యించుకున్న‌రు. భార్యాభర్తలుగా తమ ప్రయాణం ముగిసినప్పటికీ మంచి స్నేహితులుగా కొనసాగుతామని పేర్కొన్నారు. ఈ విష‌యం ప్ర‌తి ఒక్క‌రిని షాక్‌కి గురి చేసింది. ఇక ఇదిలా ఉంటే పవన్ కళ్యాణ్, అన్నా లెజినోవా 2013 సెప్టెంబర్‌లో వివాహ బంధంతో ఒక్కటయ్యారు. అప్పటి నుంచి వీరిద్దరూ తమ వ్యక్తిగత జీవితాన్ని ఎక్కువగా మీడియాకు దూరంగానే ఉంచుతూ వచ్చారు. వీరికి ఇద్దరు పిల్లలు ఉన్నారు. ఒక కుమారుడు మార్క్ శంకర్ పవనోవిచ్ కాగా, కుమార్తె కూడా ఉంది.

అయితే ఈ ఇద్దరూ తమ వైవాహిక బంధం విషయంలో పరస్పర అంగీకారంతో విడిపోగా, ఈ క్రమంలోనే పిల్లల భవిష్యత్తు, సంతోషం, సంక్షేమానికి అత్యంత ప్రాధాన్యత ఇవ్వాలని భావిస్తున్నట్లు తెలుస్తుంది. అయితే విడాకుల ప్రక్రియ పూర్తయిందా? లేక విడిపోవాలనే నిర్ణయానికి మాత్రమే వచ్చారా? అనే విషయంపై స్పష్టత రావాల్సి ఉంది. అన్నా లెజినోవా రష్యాకు చెందినవారు. 1980లో జన్మించిన ఆమె మోడల్‌గా, నటిగా గుర్తింపు పొందారు. పవన్ కళ్యాణ్‌తో పరిచయం కాకముందు ఆమె మోడలింగ్, నటన రంగాల్లో పనిచేశారు. 2011లో విడుదలైన పవన్ కళ్యాణ్ చిత్రం ‘తీన్ మార్’ షూటింగ్ సమయంలో వీరిద్దరికీ పరిచయం ఏర్పడింది. ఈ సినిమాలో అన్నా ఓ చిన్న పాత్రలో కనిపించారు.

షూటింగ్ సమయంలో ఏర్పడిన పరిచయం క్రమంగా ప్రేమగా మారింది. దీంతో 2013 సెప్టెంబర్‌లో ఇద్దరూ వివాహం చేసుకున్నారు. అప్పటి నుంచి పవన్ కళ్యాణ్ కుటుంబ జీవితంలో అన్నా కీలక భాగంగా ఉన్నారు. అన్నా లెజినోవా గురించి మరో ఆసక్తికరమైన విషయం ఆమె విద్య, వ్యాపార రంగాల్లో సాధించిన గుర్తింపు. ఎకనామిక్ టైమ్స్ కథనం ప్రకారం, ఆమె 2024లో సింగపూర్‌లోని నేషనల్ యూనివర్సిటీ నుంచి మాస్టర్ ఆఫ్ ఆర్ట్స్ డిగ్రీని పొందినట్లు సమాచారం. అంతేకాకుండా హాస్పిటాలిటీ రంగంలోనూ ఆమెకు ఆసక్తి ఉందని, సింగపూర్‌లో కొన్ని హోటళ్లతో ఆమెకు సంబంధం ఉందని వార్తలు వెలువడ్డాయి. రష్యా, సింగపూర్‌లలో ఆమెకు సుమారు రూ.1,800 కోట్ల విలువైన ఆస్తులు ఉన్నట్లు కొన్ని కథనాల్లో పేర్కొంటున్నారు. అయితే ఈ ఆస్తుల విలువ, యాజమాన్యానికి సంబంధించి అధికారిక క్లారిటీ అయితే లేదు.