Matrimonial Dispute: భార్యాభ‌ర్త‌ల గొడ‌వ‌.. భార‌త మ‌హిళ నుంచి వాంగ్మూలం తీసుకోనున్న కివీస్ పోలీసులు

న్యూఢిల్లీ: అత్తింటివారి వేధింపుల కేసులో.. కివీస్ పోలీసులు ఓ భార‌తీయ మ‌హిళ వాంగ్మూలాన్ని వీడియో రికార్డింగ్ ద్వారా సేక‌రించ‌నున్నారు. డిసెంబ‌ర్ 14వ తేదీన కివీస్ పోలీసులు ఆ స్టేట్మెంట్ తీసుకుంటారు. అయితే ఆ బాధితురాలు ప్ర‌స్తుతం ఇండియాలోనే ఉన్న‌ది. భ‌ర్త‌, అత్తింటివారు క్రూరంగా వేధిస్తున్నార‌ని, భౌతిక‌దాడి చేస్తున్నార‌ని, బెదిరింపుల‌కు పాల్ప‌డుతున్న‌ట్లు ఓ పంజాబీ మ‌హిళ కేసు పెట్టింది. ఖండాంత‌ర గృహ హింస కేసులో తొలిసారి కివీస్ పోలీసులు స్టేట్మెంట్ తీసుకోనున్నారు. మైక్రోసాఫ్ట్ టీమ్‌ల ద్వారా ఆ వీడియోను రికార్డు చేయ‌నున్నారు. కివీస్ పోలీసుల‌కు బాధితురాలు అనేక మెయిల్స్ చేసిన నేప‌థ్యంలో కేసు ద‌ర్యాప్తున‌కు అంగీకరించారు. భ‌ర్త‌, అత్త‌, మ‌రుదులు త‌న‌ను వేధించిన‌ట్లు ఢిల్లీ పోలీసు మ‌హిళా సెల్‌కు కూడా ఆ బాధితురాలు ఫిర్యాదు చేసింది. భార్యాభ‌ర్త‌ల మ‌ధ్య వివాదం కేసులో విదేశీ పోలీసులు భార‌త నేల‌పై బాధితురాలిని విచారించ‌డం ఇదే మొద‌టిసారి అవుతుంది.

అడ్వ‌కేట్ అర్పిత్ బ‌త్రా ఈ కేసుకు చెందిన వివ‌రాల‌ను వెల్ల‌డించారు. అంత‌ర్జాతీయ మ్యాట్రిమోనియ‌ల్ డిస్ప్యూట్ కేసుల్లో బాధితుల‌కు న్యాయం జ‌రుగుతుంద‌ని, కివీస్ తీసుకున్న నిర్ణ‌యం హ‌ర్ష‌ణీయ‌మ‌ని ఆ లాయ‌ర్ తెలిపారు. ఫిర్యాదు ప్ర‌కారం.. 2025 ఏప్రిల్ 19వ తేద‌నీ కివీస్ జాతీయుడిని పంజాబీ మ‌హిళ పెళ్లి చేసుకున్న‌ది. చండీఘ‌డ్‌లోని హోట‌ల్ పార్క్ గ్రాండ్‌లో హిందూ సంప్ర‌దాయం ప్ర‌కారం ఆ పెళ్లి జ‌రిగింది. ఆర్ధిక ఇబ్బందులు ఉన్నా.. పెళ్లికి ముందే పార్క్ గ్రాండ్ హోట‌ల్ బ‌స కావాల‌ని అత్తామామ‌లు బ‌ల‌వంతం చేసిన‌ట్లు చెప్పారు. పెళ్లి త‌ర్వాత 2025 జూలై 2న ఆక్లాండ్‌కు బాధితురాలు వెళ్లింది. ఆ త‌ర్వాత 2026 ఏప్రిల్ 21వ తేదీన ఆమె స్వ‌దేశం తిరిగి వ‌చ్చింది. పెళ్లి త‌ర్వాత శారీర‌క‌, మాన‌సిక వేధింపులు ఎదుర్కొన్న‌ట్లు ఆ మ‌హిళ ఫిర్యాదులో పేర్కొన్న‌ది.