కారేపల్లిలో నీటి కొరత నివారణకు ముందస్తు చర్యలు

– ఏళ్ల తరబడి నిరుపయోగంగా ఉన్న బోరుకు పునర్జీవం

కారేపల్లి, నవంబర్ 12 : వేసవిలో నీటి కొరత తలెత్తకుండా ముందస్తు చర్యల్లో భాగంగా కారేపల్లి గ్రామ పంచాయతీ ప్రత్యేక చర్యలు చేపట్టింది. సర్పంచ్ మేదరి వీరప్రతాప్ ఆధ్వర్యంలో గ్రామంలోని నిరుపయోగంగా ఉన్న బోర్లను గుర్తించి వాటికి మరమ్మతులు చేయిస్తున్నారు. ఇందులో భాగంగా డోర్నకల్ బైపాస్ రోడ్డులోని రైస్ మిల్లు సమీపంలో ఎన్నో ఏళ్లుగా వినియోగంలో లేకుండా ఉన్న బోరును గుర్తించి అవసరమైన మరమ్మతులు చేయించి తిరిగి వినియోగంలోకి తీసుకొచ్చారు. దీంతో మరో నీటి వనరు అందుబాటులోకి వచ్చిందని సర్పంచ్ తెలిపారు. ప్రజలకు తాగునీటి ఇబ్బందులు తలెత్తకుండా ముందుగానే సమస్యలను గుర్తించి పరిష్కార చర్యలు చేపడుతున్నట్లు పేర్కొన్నారు. గ్రామంలో నీటి వనరులను అందుబాటులోకి తీసుకురావడంతో పాటు ప్రజల అవసరాలకు అనుగుణంగా మౌలిక సదుపాయాల కల్పనకు కృషి చేస్తామని తెలిపారు. ఈ కార్యక్రమంలో ఉప సర్పంచ్ పెద్దమ్మ భాగ్యలక్ష్మి, వార్డు సభ్యుడు ఆదెర్ల అంజయ్య, పంచాయతీ కార్యదర్శి బి.నెహ్రూ పాల్గొన్నారు.