9 కోట్ల ఖరీదైన మందు.. కేవలం 2.5 లక్షలకే

- అందించనున్న హైదరాబాద్ పిల్లల వైద్యురాలు శివరంజని
- తొలుత ఏడుగురు చిన్నారులకు ఏడాది పాటు ఉచితంగా
- 30న తన క్లినిక్లో పంపిణీ ప్రారంభించనున్నట్లు వెల్లడి
హైదరాబాద్ సిటీబ్యూరో, నవంబర్ 20 (నమస్తే తెలంగాణ): అరుదైన జన్యువ్యాధి.. చికిత్స చేయాలంటే కోట్ల రూపాయలు ఖర్చు చేయాలి. దాని వ్యయం సామాన్యలుకెవరికీ అందుబాటులో ఉండదు. అయితే హైదరాబాద్కు చెందిన ప్రముఖ పిల్లల వైద్య నిపుణురాలు డాక్టర్ శివరంజని అదే మందును కేవలం కొన్ని లక్షల ఖరీదుకే అత్యంత చౌకగా అందించేందుకు శ్రీకారం చుట్టారు. అలన్ -హెర్డ్నన్ -డెడ్లీ సిండ్రోమ్ (ఏహెచ్ డీఎస్) లేదా ఎంసీ టీ8 లోపం అనే అరుదైన జన్యుపరమైన వ్యాధితో బాధపడుతున్న చిన్నారులకు ‘టిరాట్రికోల్’ అనే ఔషధాన్ని ఈ ట్రీట్మెంట్లో ఉపయోగిస్తారు.
ఈ మెడిసిన్ను ఎంసీటీ8తో బాధపడుతున్న ఒక చిన్నారికి ఏడాది చికిత్స కోసం సుమారు రూ.4.68 కోట్ల నుంచి రూ.9 కోట్ల వరకు ఖర్చు అవుతుందని వైద్య వర్గాలు చెబుతున్నాయి. అంత డబ్బు వెచ్చించే స్థోమత లేని పేద కుటుంబాలకు చెందిన బాధిత పిల్లలకు చౌక ధరకే ఖరీదైన మందులను అందించేందుకు డాక్టర్ శివరంజని సంతోష్, యాక్సెస్ టు మెడిసిన్స్ ఇండియా ప్రతినిధి కె.ఎం గోపకుమార్తో కలిసి ప్రయత్నాలు ప్రారంభించారు.
రూ.9 కోట్లకు పైగా ధర ఉన్న మెడిసిన్ను కేవలం రూ.2.5 లక్షలకే అందించేందుకు కృషి చేస్తున్నట్లు వారు తెలిపారు. జన్యుపరమైన వ్యాధి తో బాధపడుతున్న ఏడుగురు చిన్నారులకు ఉచిత చికిత్స అందించనున్నట్లు ప్రకటించారు. ఈనెల 30న హైదరాబాద్లోని డాక్టర్ శివరంజని క్లినిక్లో ఇద్దరు చిన్నారులకు, బెంగళూరులో మరో ఐదుగురికి తొలి విడతగా ఈ ఖరీదైన ఔషధాన్ని అందజేయనున్నట్లు వారు తెలిపారు.
Comments (0)