15 నుంచి ఆశా కార్యకర్తల సమ్మె

• మూడేండ్లయినా హామీలు అమలు కాలేదని ఆగ్రహం
• సమ్మెకు మద్దతు ఇవ్వాలని ఎమ్మెల్యే జగదీశ్‌రెడ్డికి వినతి

సూర్యాపేట, నవంబర్‌ 12 : అడ్డగోలు హామీలతో అధికారంలోకి వచ్చిన కాంగ్రెస్‌ ప్రభుత్వం అన్ని వర్గాల ప్రజలతోపాటు తమనూ నిలువునా మోసం చేసిందని ఆశా కార్యకర్తలు మండిపడ్డారు. తమ సమస్యల పరిష్కారం కోసం ఈ నెల 15 నుంచి నిరవధిక సమ్మె చేపట్టనున్నట్టు ప్రకటించారు. ఈ మేరకు గురువారం సూర్యాపేట అదనపు కలెక్టర్‌, డీఎంహెచ్‌వోకు సమ్మె నోటీసులు అందజేశారు. అనంతరం మాజీ మంత్రి, ఎమ్మెల్యే జగదీశ్‌రెడ్డిని ఎమ్మెల్యే క్యాంపు కార్యాలయంలో కలిశారు.

తమ సమస్యలను ప్రభుత్వం దృష్టికి తీసుకెళ్లి పరిష్కరించేలా చొరవ తీసుకోవాలని కోరడంతోపాటు సమ్మె నోటీసు అందజేశారు. ఈ సందర్భంగా పలువురు ఆశా కార్యకర్తలు మాట్లాడుతూ.. హామీలు ఇచ్చి మూడేండ్లు అయినా అమలు కాలేదని ఆవేదన వ్యక్తంచేశారు. కేసీఆర్‌ కంటికి రెప్పలా కాపాడుకుంటే రేవంత్‌రెడ్డి మాత్రం తమ చావు కోరుతున్నాడని వాపోయారు.