BJP MLA Tofazzal Hossain | ప్రజల జీవనశైలిపై బీజేపీ ఎమ్మెల్యే వివాదస్పద వ్యాఖ్యలు.. వెల్లువెత్తిన విమర్శలు

అగర్తలా: ఒక రాష్ట్ర ప్రజలు, వారి జీవనశైలిపై బీజేపీ ఎమ్మెల్యే వివాదస్పద వ్యాఖ్యలు చేశారు. ఆదివాసీల పార్టీ పుట్టినప్పటి నుంచి పందులతో కలిసి నిద్రపోతారు, పందులను పెంచుతారు, పందులనే తింటారని ఆయన అన్నారు. ఈ నేపథ్యంలో ఆ బీజేపీ ఎమ్మెల్యేపై విమర్శలు వెల్లువెత్తాయి. (BJP MLA Tofazzal Hossain) త్రిపురలోని సోనామురా నియోజకవర్గానికి చెందిన బీజేపీ ఎమ్మెల్యే తోఫజ్జల్ హొస్సేన్ వివాదస్పద వ్యాఖ్యలు చేశారు. ఆదివాసీల పార్టీ అయిన త్రిపుర మోథా పార్టీని ఆయన విమర్శించారు. ‘వీరు పుట్టినప్పటి నుంచి పందులతో కలిసి నిద్రపోతారు. పందులను పెంచుతారు. పందులనే తింటారు’ అని అన్నారు. ఈ వీడియో క్లిప్‌ సోషల్‌ మీడియాలో వైరల్‌ అయ్యింది.

కాగా, ఆదివాసీ ప్రజల జీవనశైలి, ఆహారపు అలవాట్లను అవహేళన చేసిన బీజేపీ ఎమ్మెల్యే తోఫజ్జల్ హొస్సేన్‌పై విమర్శలు వెల్లువెత్తాయి. త్రిపుర మోథా పార్టీ వ్యవస్థాపకుడు ప్రద్యోత్ కిషోర్ దెబ్బర్మ దీనిపై స్పందించారు. ఆ బీజేపీ ఎమ్మెల్యే తన వ్యాఖ్యల పట్ల రాష్ట్ర ప్రజలకు క్షమాపణలు చెప్పాలని డిమాండ్ చేశారు.

అయితే త్రిపురకు చెందిన ఒక వ్యక్తిపై జాతి వివక్షాపూరిత వ్యాఖ్యలు చేశారనే ఆరోపణలపై అరెస్టైన సోషల్ మీడియా ఇన్‌ఫ్లుయెన్సర్ అమీర్ షోకీన్‌ మాదిరిగా ఆ బీజేపీ ఎమ్మెల్యేపై చట్టపరమైన చర్యలు చేపట్టాలని సీపీఎం శాసనసభ్యుడు, ప్రతిపక్ష నేత జితేంద్ర చౌదరి డిమాండ్‌ చేశారు. ఆయనపై చర్యలు తీసుకోవాలని రాష్ట్ర ముఖ్యమంత్రి, హోం మంత్రికి తాను విజ్ఞప్తి చేస్తున్నానని ఆయన అన్నారు.

మరోవైపు బీజేపీ ప్రధాన కార్యదర్శి బిపిన్ దెబ్బర్మ కూడా దీనిపై స్పందించారు. ‘ఈ వ్యాఖ్యలు సరైనవని నేను భావించడం లేదు. ప్రతి సమాజానికి దానికంటూ ఒక జీవనశైలి, ఆహారపు అలవాట్లు ఉంటాయి. మేము ఈ విషయాన్ని మా పార్టీ అధ్యక్షుడి దృష్టికి, అలాగే ముఖ్యమంత్రి దృష్టికి తీసుకెళ్తాం’ అని పేర్కొన్నారు.