‘విద్యార్థుల్లోని ప్ర‌తిభ వెలికితీత‌కు చెకుముకి సైన్స్ సంబురాల నిర్వ‌హ‌ణ’

– ముల‌క‌ప‌ల్లి ఎంఈఓ స‌త్య‌నారాయ‌ణ‌

ములకలపల్లి, నవంబర్ 11 : విద్యార్థుల్లో శాస్త్రీయ ఆలోచనా విధానాన్ని, ప్రశ్నించే తత్వాన్ని, సృజనాత్మకతను పెంపొందించేందుకు చెకుముకి సైన్స్ సంబరాలు నిర్వహిస్తున్నట్లు ముల‌క‌ల‌ప‌ల్లి ఎంఈఓ సత్యనారాయణ తెలిపారు. బుధవారం ములకలపల్లి మండలంలో చెకుముకి సైన్స్ సంబరాలు–2026 పోస్టర్‌ను ఆయన ఆవిష్కరించి మాట్లాడారు. విద్యార్థుల్లో దాగి ఉన్న శాస్త్రీయ ప్రతిభను వెలికితీయడంతో పాటు, విజ్ఞాన శాస్త్రంపై ఆసక్తిని పెంపొందించడం ఈ కార్యక్రమ ముఖ్య ఉద్దేశమన్నారు. విద్యార్థులు మూఢ నమ్మకాలకు దూరంగా ఉంటూ, ప్రతి విషయాన్ని శాస్త్రీయ దృక్పథంతో ఆలోచించేలా ప్రోత్సహించాలని సూచించారు. ఈ నెల 12న పాఠశాల స్థాయి పోటీలు, 21న మండల స్థాయి పోటీలు, 28న జిల్లా స్థాయి పోటీలు నిర్వహించనున్నట్లు తెలిపారు. విద్యార్థులు, ఉపాధ్యాయులు ఈ కార్యక్రమాన్ని విజయవంతం చేయాలని కోరారు. ఈ కార్యక్రమంలో ముదిగొండ వెంకన్న, హరిలాల్ పాల్గొన్నారు.