హెచ్‌డీఎఫ్‌సీ బ్యాంక్‌ వడ్డీరేట్ల పెంపు

న్యూఢిల్లీ, నవంబర్‌ 11: దేశీయ బ్యాంకింగ్‌ దిగ్గజాల్లో ఒకటైనా హెచ్‌డీఎఫ్‌సీ బ్యాంక్‌ రుణ గ్రహీతలకు మరోసారి షాకిచ్చింది. మార్జినల్‌ కాస్ట్‌ ఆఫ్‌ లెండింగ్‌ రేటు(ఎంసీఎల్‌ఆర్‌)తో అనుసంధానమైన రుణాలపై వడ్డీరేట్‌ను 15 బేసిస్‌ పాయింట్లు పెంచుతూ నిర్ణయం తీసుకున్నది. బ్యాంక్‌ తీసుకున్న తాజా నిర్ణయంతో గృహ, వ్యక్తిగత రుణాలు తీసుకున్నవారిపై మరింత భారం పడింది. పెరిగిన రేట్లు ఇప్పటికే అమల్లోకి వచ్చాయి.

దీంతో ప్రస్తుతం బ్యాంక్‌ ఎంసీఎల్‌ఆర్‌ రేటు 7.85 శాతం నుంచి 8.70 శాతానికి పెరిగాయి. గతంలో ఇవి 7.75 శాతం నుంచి 8.55 శాతంగా ఉండేవి. ఒక్కరోజు కాలపరిమితి కలిగిన రుణాలపై ఎంసీఎల్‌ఆర్‌ని 5 బేసిస్‌ పాయింట్లు పెంచడంతో 7.85 శాతానికి చేరుకున్నది. అలాగే నెల రుణాలపై రేటు 10 బేసిస్‌ పాయింట్లు సవరించడంతో 7.75 శాతం నుంచి 7.85 శాతానికి చేరుకోగా, మూడు నెలల రుణాలపై రేటు 10 బేసిస్‌ పాయింట్లు పెంచడంతో వడ్డీరేటు 7.95 శాతం నుంచి 8.05 శాతానికి చేరుకున్నది.

దీంతోపాటు ఆరు నెలల రుణాలపై రేటు 15 బేసిస్‌ పాయింట్లు సవరించడంతో 8.30 శాతానికి చేరుకున్నది. అంతకుముందు ఇది 8.15 శాతంగా ఉన్నది. అలాగే ఏడాది రుణాలపై రేటు 15 బేసిస్‌ పాయింట్లు సవరించడంతో వడ్డీరేటు 8.45 శాతానికి చేరుకోగా, రెండేండ్ల రుణాలపై రేటు అంతే స్థాయిలో సవరిండంతో 8.55 శాతానికి చేరుకోగా, మూడేండ్ల రుణాలపై వడ్డీరేటు 8.70 శాతానికి పెంచింది. బ్యాంక్‌ తీసుకున్న తాజా నిర్ణయంతో ఎంసీఎల్‌ఆర్‌తో అనుసంధానమైన పాత రుణగ్రహీతలపై ఆర్థిక భారం పడనున్నది. గృహ, వ్యక్తిగత రుణాలతోపాటు ఇతర రుణాలు తీసుకున్నవారు తమ నెలవారి చెల్లింపులు అధికంగా చెల్లించాల్సివుంటుంది.