ఐవోబీ ఎఫ్‌డీలపై వడ్డీరేట్లలో మార్పులు

న్యూఢిల్లీ, నవంబర్‌ 11: ప్రభుత్వరంగ సంస్థ ఇండియన్‌ ఓవర్‌సీస్‌ బ్యాంక్‌..ఫిక్స్‌డ్‌ డిపాజిట్లపై చెల్లించే వడ్డీరేట్లలో మార్పులు చేసింది. 444 రోజుల కాలపరిమితి కలిగిన డిపాజిట్లపై వడ్డీరేటును 15 బేసిస్‌ పాయింట్లు పెంచడంతో వడ్డీరేటు 6.75 శాతానికి చేర్చింది. అంతకుముందు ఇది 6.60 శాతంగా ఉన్నది. మరోవైపు, 180 రోజుల నుంచి 269 రోజుల కాలపరిమితి కలిగిన డిపాజిట్లపై వడ్డీరేటును పావు శాతం తగ్గించింది. దీంతో డిపాజిట్లపై వడ్డీరేటు 4.75 శాతం నుంచి 4.50 శాతానికి దిగొచ్చింది.

ఈ నూతన రేట్లు ఈ నెల 10 నుంచి అమలులోకి వచ్చాయి. రూ.3 కోట్ల లోపు టర్మ్‌ డిపాజిట్లకు మాత్రమే ఈ వడ్డీరేట్లు వర్తించనున్నాయి. కానీ, మిగతా కాలపరిమితి కలిగిన ఫిక్స్‌డ్‌ డిపాజిట్లపై వడ్డీరేట్లలో ఎలాంటి మార్పులు చేయలేదు. మరోవైపు, సీనియర్‌ సిటిజన్ల డిపాజిట్లపై మరో అర శాతం వడ్డీరేటును అదనంగా చెల్లించనున్నది. అలాగే సూపర్‌ సీనియర్‌ సిటిజన్లకు 75 బేసిస్‌ పాయింట్లు చెల్లించనున్నది. ఇప్పటికే హెచ్‌డీఎఫ్‌సీ, ఐసీఐసీఐ, కొటక్‌ మహీంద్రా బ్యాంకులు డిపాజిట్లపై వడ్డీరేట్లలో మార్పులు చేసిన విషయం తెలిసిందే.