సజ్జనార్‌కు షాక్‌!

• అప్రాధాన్యత పోస్టుకు సర్కార్‌ బదిలీ
• సోషల్‌మీడియా పిచ్చితో రోజుకొక పోస్టు
• డీసీపీలను తిట్టడమే కొంపముంచిందంటూ చర్చ
• మీడియా, బీఆర్‌ఎస్‌ శ్రేణులపై కక్ష సాధింపు
• సజ్జనార్‌ హయాంలో నేరస్తులుగా పోలీసులు
• కోటరీని కాపాడుకునేందుకు తప్పటడుగులు
• మూడేండ్ల ప్రభుత్వంలో నలుగురు సీపీలు బదిలీ

తాను కూర్చున్న సీటు శాశ్వతమనుకున్నారో ఏమో.. తన పరిధి దాటి కోర్టు ఎన్నిసార్లు చెప్పినా వినకుండా సిబ్బందిని ఒత్తిళ్లకు గురిచేసి జర్నలిస్టులు, ప్రతిపక్ష పార్టీ శ్రేణుల గొంతునొక్కుతూ కక్షసాధింపు చర్యలకు పాల్పడ్డారు..రోజుకొక పోస్టుతో ఏదో ఒక నీతి సూత్రాలతో సోషల్‌మీడియాలో తన పరిధి మరిచి రెచ్చిపోయారు. కమిషనరేట్‌లో పనిచేస్తున్న డీసీపీ స్థాయి అధికారులను ఇష్టమొచ్చినట్లు తిట్టారు.

ఇవన్నీ కాదంటూ ఏకపక్ష నిర్ణయాలతో కమిషనరేట్‌కే మచ్చ తెచ్చేలా ప్రవర్తించిన తన బ్యాచ్‌గా పిలిచే ఇన్‌స్పెక్టర్లను, డర్టీ డజన్‌ ’కే’ బ్యాచ్‌ను కాపాడుకునేందుకు ప్రయత్నాలు చేసి రోజూ వార్తల్లోకెక్కారు. ఇది నిన్నటివరకు హైదరాబాద్‌ సీపీగా పనిచేసి ఔట్‌ అయిన వీసీ సజ్జనార్‌ పరిస్థితి. ఆయన తాను కూర్చున్న కుర్చీకి పక్కరాష్ట్రం నుంచి అధికారబలం అరువు తెచ్చుకుని బలం పెంచుకోవాలనుకున్నారు.

సిటీబ్యూరో, నవంబర్‌ 12(నమస్తే తెలంగాణ): మరో ఏడాది పాటు ఇక్కడే పనిచేస్తూ అందుకు తగిన బలాన్ని సమకూర్చుకుని తాను అనుకున్న రాజకీయలక్ష్యాన్ని నెరవేర్చుకోవాలనుకుంటున్న క్రమంలోనే సర్కారు ఆయనపై బదిలీ వేటు వేసింది. సజ్జనార్‌ను సీపీగా మార్చడానికి అనేక కారణాలున్నాయని కమిషనరేట్‌ పోలీసుల్లో అంతర్గతంగా చర్చించుకుంటున్నారు. సజ్జనార్‌ అంటేనే ఎక్స్‌.. ఎక్స్‌ అంటేనే సజ్జనార్‌ అన్నట్లుగా ఆయన వచ్చిన రోజు నుంచి బదిలీ అయి వెళ్లేవరకు కమిషనర్‌ ప్రస్థానం కొనసాగింది. ఏ విషయం చెప్పాలనుకున్నా అది ఎక్స్‌ ద్వారా చెప్పడం, తద్వారా అనేక నీతి సూత్రాలు వల్లించడం, వాటిని మీడియాలో రావాలని కోరుకోవడం పోలీసువర్గాల్లోనే చర్చకు దారితీసింది.

ఇదే సమయంలో ఎక్స్‌లో పోలీసు శాఖపై వస్తున్న పోస్టులకు మాత్రం ఆయన స్పందించకపోవడంతో నెటిజన్లు ఆయన వైఖరిని చాలాసార్లు తప్పుబట్టారు. సైబర్‌నేరాలు, యాక్సిడెంట్లు.. ఇలా అన్ని విషయాల్లో పొద్దుపొద్దున్నే పోస్టులు పెట్టడం, వాటిని వైరల్‌ చేసుకోవడంతో కొన్నిసార్లు ఈ ప్రయోగం విఫలమైందని కూడా ఓ సీనియర్‌ పోలీసు అధికారి వ్యాఖ్యానించారు. సజ్జనార్‌ తన ప్రాంతీయతను చాటుకునేందుకు కూడా ఆ వేదికలను ప్రచారం చేసే ప్రయత్నం చేశారంటూ పోలీసులే అంటున్నారు.

మీడియా, నేతలపై చిందులు..

సజ్జనార్‌ సీపీగా బాధ్యతలు చేపట్టిన తర్వాత మీడియా గొంతు నొక్కేశారు. అనవసరంగా కేసులు బనాయించి జర్నలిస్టులను ఇబ్బందులకు గురిచేశారు. మహిళల భద్రతకు అత్యంత ప్రాధాన్యమిస్తామని బహిరంగంగా ప్రకటనలు చేసిన సజ్జనార్‌ మహిళాజర్నలిస్టులను, చంటిపిల్లల తల్లులను రాత్రిపూట విచారణ పేరుతో వేధించారు. ఇదే సమయంలో బీఆర్‌ఎస్‌ శ్రేణులపై అక్రమ కేసులు బనాయించి వారిని జైళ్లకు పంపడం, అర్ధరాత్రి అరెస్టులతో అరాచకం సృష్టించారు.

ఎన్నిసార్లు బీఆర్‌ఎస్‌ శ్రేణులను అరెస్టు చేసినా వారికి కోర్టులు ఉపశమనం కలిగించడం ఆయన వైఖరికి చెంపపెట్టు అనే చెప్పాలి. ఇలా సజ్జనార్‌ నియంతృత్వధోరణి ప్రదర్శిస్తూనే కొన్ని సందర్భాల్లో తన ప్రతాపాన్ని చూపడానికి ఆయనే స్వయంగా విచారణలో పాల్గొని అక్కడ విచారణ ఎదుర్కొంటున్నవారిపై విచారణ పేరుతో స్వయంగా దాడిచేశారన్న ఆరోపణలు కూడా ఉన్నాయి.

పోలీసులే దొంగలయ్యారు..

గతంలో ఎన్నడూ లేని విధంగా సజ్జనార్‌ బాధ్యతలు స్వీకరించింది మొదలు రిలీవ్‌ అయ్యేవరకు దాదాపుగా యాభైమందికి పైగా పోలీసులపై కేసులు అయ్యాయి. నిందితుడి నుంచి జప్తు చేసిన రోలెక్స్‌ వాచి కొట్టేసిన కానిస్టేబుల్‌కు సహకరించి ఆ లావాదేవీల్లో భాగస్వామ్యమున్న పోలీసు అధికారి ఆయన శిష్యుడేనని, ఆయనను కేసు తప్పించడంలో పెద్దసారు పాత్ర ఉందని ఇప్పటికీ కమిషనరేట్‌లో చెప్పుకుంటారు.

ఒకరు కాదు.. ఇద్దరు కాదు ఏకంగా యాభైమందికిపైగా ఏసీపీలు, ఇన్‌స్పెక్టర్లు, ఎస్‌ఐలు, కానిస్టేబుళ్లు, హోంగార్డులపై క్రిమినల్‌ కేసులు కావడం కూడా సజ్జనార్‌ హయాంలోనేనని ప్రస్తుతం కమిషనరేట్‌లో పోలీసు వర్గాలు చెప్పుకుంటున్నాయి. మరోవైపు సజ్జనార్‌ బదిలీ అయ్యేరోజుకు వారం రోజుల ముందు నుంచే ఎనిమిది పోలీసులు దారిదోపిడీ, లంచాలు ఇతర వ్యవహారాల్లో కేసుల పాలయ్యారు.

పోలీసుల శాఖలో తీవ్రంగా చర్చ

సజ్జనార్‌ కమిషనర్‌గా బాధ్యతలు చేపట్టి కేవలం 13 నెలలే అయింది. ఈలోగానే సర్కార్‌ ఆయనను బదిలీ చేసింది. హైదరాబాద్‌ సిటీకి పోలీసు కమిషనర్‌ను మారుస్తూ వీసీ సజ్జనార్‌ స్థానంలో మహేశ్‌భగవత్‌ను నియమించింది. రాష్ట్రంలోనే కీలకమైన హైదరాబాద్‌ పోలీసు కమిషనరేట్‌కు మూడేళ్లలో నలుగురు సీపీలను బదిలీ చేయడం పోలీసు శాఖలో చర్చనీయాంశమైంది. సిటీలో నేరాలను కట్టడి చేయడంలో ప్రభుత్వ నిర్లక్ష్యానికి ఇది పరాకాష్ట. కాంగ్రెస్‌ ప్రభుత్వం ఏర్పడిన కొత్తలో సాధారణ బదిలీల్లో భాగంగా అప్పటి సీపీ సందీప్‌శాండిల్యను బదిలీ చేసి ఆయన స్థానంలో కొత్త కోట శ్రీనివాసరెడ్డిని నియమించారు.

2024 సెప్టెంబర్‌లో కొత్తకోటను బదిలీ చేసి ఆయన స్థానంలో ప్రస్తుత డీజీపీ సీవీ ఆనంద్‌ను సిటీ పోలీసు కమిషనర్‌గా నియమించారు. సరిగ్గా ఏడాది గడిచిందో లేదో ఆయన స్థానంలో అప్పటివరకు ఆర్టీసీ ఎండీగా ఉన్న సజ్జనార్‌ను గత సంవత్సరం సెప్టెంబర్‌ 27న సీపీగానియమించారు. 13నెలల తర్వాత ఇప్పుడు సజ్జనార్‌ను బదిలీ చేసి ఆయన స్థానంలో మహేశ్‌భగవత్‌ను సీపీగా నియమిస్తూ ప్రభుత్వం ఉత్తర్వులు జారీ చేసింది. నగరంలో గతంతో పోలిస్తే క్రైమ్‌రేటు విపరీతంగా పెరుగుతోంది. ఈ సమయంలో రాష్ర్టానికే గుండెకాయలాంటి హైదరాబాద్‌ సీపీగా మూడేళ్లలో నలుగురిని మార్చడంతో నగరంలో నేరాల నియంత్రణపై పోలీసుపట్టు కోల్పోయింది.

దీంతోరోజుకు పదుల సంఖ్యలో హత్యలు, కిడ్నాప్‌లు, దొంగతనాలు వంటి అనేక నేరాలు, జాతీయ, అంతర్జాతీయ నేరగాళ్లకు భాగ్యనగరం వేదికగా మారుతున్నదని పోలీసు రికార్డులే చెబుతున్నాయి.. కాంగ్రెస్‌ ప్రభుత్వం గద్దెనెక్కినదగ్గరి నుంచి నగరంలో లా అండ్‌ ఆర్డర్‌ పూర్తిగా కంట్రోల్‌ తప్పిందని పోలీసు అధికారులే అంటున్నారు. సజ్జనార్‌ సీపీగా వచ్చిన తర్వాత పోలీసులే నేరస్తులుగా మారడం, వారే పలు నేరాలు చేయడం, నగరంలోని అనేక పోలీసు స్టేషన్లలో ఆయన తన కోటరీని నియమించుకుని వారికి పూర్తి స్వేచ్ఛనివ్వడంతో కొన్ని పోలీసుస్టేషన్లు లంచాలకు మారుపేరుగా మారాయనే విమర్శలు ఉన్నాయి.

నోటిదురుసు దెబ్బకొట్టింది..

సజ్జనార్‌ అంటే పీపుల్‌ ఫ్రెండ్లీ అని గతంలో పేరుండేది. కానీ సీపీగా వచ్చిన తర్వాత నుంచి సజ్జనార్‌ వైఖరి చాలా మారిందంటూ ఆయనతో సన్నిహితంగా మెదిలిన కొందరు చెప్పారు. విపరీతమైన నోటి దురుసుతో ఎవరినీ లెక్కచేయకుండా ఇష్టమొచ్చినట్టు మాట్లాడడం ఆయనపై కమిషనరేట్‌లో వ్యతిరేకత పెం చిందని ఓ సీనియర్‌ అధికారి చెప్పారు. ఇటీవల ఓ సమావేశంలో డీసీపీలను తిట్టిన తీరు సీఎంవోకు ఫిర్యాదు చేసే వరకు వెళ్లిందని దీంతో వారు కూడా సజ్జనార్‌ను మందలించినట్టు తెలిసింది. పోలీసింగ్‌ విషయంలో అధికారులు స్ట్రిక్ట్‌గా ఉండడం సహజమే అయి నా ఆయనకు నచ్చిన వారితో ఒకలా నచ్చకుంటే మరోలా డీసీపీ స్థాయిలోనే పక్షపాతం చూపించారని సమాచారం.