సంక్షోభంలో తయారీ రంగం!

• రాష్ట్రంలో 50 వేల పరిశ్రమల మనుగడ ప్రశ్నార్థకం.. విద్యుత్తు కోతలు, బిల్లుల భారమే ప్రధాన కారణం

• సోలార్‌ విద్యుత్తు ఉత్పత్తికి కూడా సహకరించని వైనం

హైదరాబాద్‌, నవంబర్‌ 13 (నమస్తే తెలంగాణ): కాంగ్రెస్‌ సర్కార్‌ అనాలోచిత, అసమర్థ విధానల వల్ల రాష్ట్రంలో తయారీ రంగం సంక్షోభంలో కూరుకుపోయింది. విద్యుత్తు సరఫరాలో వైఫల్యాలు, నిత్యకృత్యంగా మారిన కరెంట్‌ కోతలు, మోయలేని టారిఫ్‌లు వెరసి రాష్ట్రంలో దాదాపు 50 వేల పరిశ్రమలు మూతపడే దుస్థితి దాపురించింది. రాష్ట్రంలో గరిష్ఠ విద్యుత్తు డిమాండ్‌ ఇటీవల రికార్డు స్థాయిలో 20,003 మెగావాట్లకు పెరిగింది. రోజువారీ వినియోగం 334.54 మిలియన్‌ యూనిట్లకు చేరింది. ఇందులో తయారీ రంగానికి చెందిన పరిశ్రమలు దాదాపు 95 మిలియన్‌ యూనిట్ల విద్యుత్తును వినియోగించుకుంటున్నాయి. ఈ పరిశ్రమలపై ప్రభుత్వం విద్యుత్తు చార్జీల రూపంలో విచక్షణారహితంగా భారం మోపుతుండటంతో ఉత్పత్తి వ్యయం తడిసి మోపెడవుతున్నది.

సంక్షేమ పథకాల అమలుకు, విద్యుత్తు సబ్సిడీలకు అవుతున్న ఖర్చును పూడ్చుకునేందుకు పరిశ్రమలపై ప్రభుత్వం అడ్డగోలుగా క్రాస్‌ సబ్సిడీ విధిస్తున్నట్టు ఆయారంగ నిపుణులు ఆందోళన వ్యక్తంచేస్తున్నారు. పరిశ్రమలను ఎంఎస్‌ఎంఈలు, ఉత్పాదక యూనిట్లు, భారీ, హెచ్‌టీ పరిశ్రమలుగా వర్గీకరించి ఇటీవలకాలంలో యూనిట్‌ విద్యుత్‌ చార్జీని రూ.7.70 నుంచి రూ.10 వరకు పెంచింది. అంతటితో ఆగకుండా వేల కోట్ల ట్రూ-అప్‌ చార్జీలు, ఇంధన సర్‌చార్జీలను కూడా పరిశ్రమలపైనే రుద్దుతున్నట్టు వాపోతున్నారు. సకాలంలో విద్యుత్తు బిల్లులు చెల్లించలేని పరిశ్రమల నుంచి ఏకంగా 18 శాతం చక్రవడ్డీతో ఆలస్య రుసుమును (లేట్‌ పేమెంట్‌ సర్‌చార్జీ) ప్రభుత్వం వసూలు చేస్తున్నదని ఆగ్రహం వ్యక్తం చేస్తున్నారు. వ్యాపారంలో సంపాదించిన మొత్తం ఆదాయంలో సగం విద్యుత్‌ బిల్లులకే చెల్లించాల్సివస్తున్నదని వారు వాపోతున్నారు.

నాణ్యమైన విద్యుత్తు సరఫరాలో విఫలం

పరిశ్రమలకు నాణ్యమైన విద్యుత్తును అందించడంలోనూ కాంగ్రెస్‌ సర్కార్‌ ఘోరంగా విఫలమవుతున్నది. హైదరాబాద్‌, మేడ్చల్‌, రంగారెడ్డి, సంగారెడ్డిలాంటి ప్రధాన పారిశ్రామికవాడల్లో సాయంత్రం పీక్‌ అవర్లలో ఆకస్మిక వోల్టేజ్‌ హెచ్చుతగ్గులు, అనూహ్య ఫీడర్‌ ట్రిప్పింగ్‌లు నిత్యకృత్యంగా మారాయి. కనీస సమాచారం కూడా ఇవ్వకుండా పరిశ్రమలకు ఆకస్మికంగా విద్యుత్తు సరఫరా నిలిపివేస్తుండటంతో అత్యాధునిక ఆటోమేటెడ్‌ యంత్రాలు పాడైపోవడంతోపాటు అప్పటికే ప్రాసెస్‌లో ఉన్న లక్షల రూపాయల ముడిసరుకు ఎందుకూ పనికిరాకుండా పోతున్నట్టు పారిశ్రామికవేత్తలు ఆందోళన వ్యక్తంచేస్తున్నారు. మరోవైపు, విద్యుత్తు ఖర్చులను తగ్గించుకునేందుకు రూఫ్‌టాప్‌ సోలార్‌ ప్లాంట్లను ఏర్పాటు చేసుకుందామనుకుంటున్న పరిశ్రమల పట్ల ప్రభుత్వం తీవ్ర నిర్లక్ష్యంగా వ్యవహరిస్తున్నది. నెట్‌ మీటరింగ్‌ అనుమతుల కోసం దరఖాస్తు చేసుకుంటే నెలల తరబడి డిసమ్‌ల కార్యాలయాల చుట్టూ తిప్పించుకుంటున్నారని పారిశ్రామికవేత్తలు మండిపడుతున్నారు.

పొరుగు రాష్ట్రాల్లో రాయితీలు

పొరుగునే ఉన్న మహారాష్ట్ర, ఆంధ్రప్రదేశ్‌, తమిళనాడు లాంటి రాష్ట్రాలు పారిశ్రామిక విద్యుత్తుపై రాయితీలు ఇవ్వడంతోపాటు సులభతర వాణిజ్య విధానాలు అవలంబిస్తున్నాయి. కానీ, తెలంగాణలో కాంగ్రెస్‌ సర్కార్‌ మాత్రం పరిశ్రమలను ఆదాయ వనరుగా మాత్రమే చూస్తున్నది. పొరుగు రాష్ర్టాల కంటే తెలంగాణలోనే విద్యుత్తు ధరలు అధికంగా ఉన్నాయని, పరిస్థితులు ఇలాగే కొనసాగితే.. తెలంగాణ నుంచి పెట్టుబడులు పొరుగు రాష్ట్రాలకు తరలిపోవడం ఖాయమని పారిశ్రామిక సంఘాలు హెచ్చరిస్తున్నాయి.

ఓపెన్‌ యాక్సెస్‌ విద్యుత్తుపై వీరబాదుడు

డిస్కమ్‌ల నుంచి అధిక ధరకు కరెంట్‌ కొనలేక ఓపెన్‌ యాక్సెస్‌ మార్గంలో బయట మారెట్‌ నుంచి సరసమైన ధరకు విద్యుత్తు తెచ్చుకోవాలని భావిస్తున్న పరిశ్రమలను సైతం సర్కార్‌ వదలడం లేదు. ఓపెన్‌ యాక్సెస్‌ విద్యుత్తుపై భారీగా అదనపు సర్‌చార్జీలు, వీలింగ్‌ చార్జీలు విధించి ఆ మార్గాన్ని మూసివేస్తున్నది. ఈ అదనపు చార్జీల నుంచి కనీసం 6 నెలలపాటైనా ఉపశమనం కల్పించాలన్న పారిశ్రామికవేత్తల విజ్ఞప్తులను కూడా ప్రభుత్వ పెద్దలు పట్టించుకోవట్లేదు.