వజ్రమ్మ ఘన విజయం చేనేత రంగానికి గర్వకారణం : మాజీ మంత్రి గుంటకండ్ల జగదీశ్‌ రెడ్డి

గట్టుప్పల్, నవంబర్ 11 : వజ్రమ్మ ఘన విజయం చేనేత రంగానికి గర్వకారణం అని మాజీ మంత్రి, సూర్యపేట ఎమ్మెల్యే గుంటకండ్ల జగదీశ్ రెడ్డి అన్నారు. ఆల్ ఇండియా హ్యాండ్లూమ్స్ వీవర్స్ కో-ఆపరేటివ్ సొసైటీ, న్యూఢిల్లీ ఎన్నికల్లో ఘన విజయం సాధించిన కర్నాటి వజ్రమ్మ వెంకటేశం దంపతులు బుధవారం హైదరాబాద్‌లో మాజీ మంత్రి, సూర్యాపేట ఎమ్మెల్యే గుంటకండ్ల జగదీష్ రెడ్డిని మర్యాదపూర్వకంగా కలిశారు. ఈ సందర్భంగా జగదీష్ రెడ్డి వజ్రమ్మ వెంకటేశం దంపతులను శాలువాతో సత్కరించి అభినందించారు. చేనేత రంగ అభివృద్ధికి వారి సేవలు అభినందనీయమని కొనియాడారు.

ఆల్ ఇండియా హ్యాండ్లూమ్స్ వీవర్స్ కో-ఆపరేటివ్ సొసైటీ ఎన్నికల్లో విజయం సాధించిన సందర్భంగా బీఆర్ఎస్ పార్టీ ఆధ్వర్యంలో ఈ నెల19 గట్టుప్పల్ మండల కేంద్రంలో జరిగే అభినందన సభ కార్యక్రమానికి మాజీ మంత్రి గుంటకండ్ల జగదీష్ రెడ్డి, మాజీ ఎమ్మెల్యే కూసుకుంట్ల ప్రభాకరరెడ్డి ముఖ్య అతిథులుగా హాజరై విజయవంతం చేయాలని కోరగా సానుకూలంగా స్పందించినట్లు వారు తెలిపారు. ఈ సభకు వివిధ చేనేత సంఘాల అధ్యక్షులు, ప్రతినిధులు, పారిశ్రామికవేత్తలు, నియోజకవర్గంలోని బీఆర్ఎస్ పార్టీ నాయకులు, ముఖ్యులు పెద్ద ఎత్తున హాజరుకానున్నట్లు, చేనేత కార్మికుల సంక్షేమం, చేనేత పరిశ్రమ అభివృద్ధిపై ఈ సభలో చర్చించనున్నట్లు సమాచారం. ఈ కార్యక్రమంలో కర్నాటి గిరి ప్రసాద్, బీఆర్ఎస్ నాయకులు పాల్గొన్నారు.