మా పొట్టగొట్టే పనులు చేయొద్దు

• యాసంగి సాగు ప్రణాళిక ఏమిటో స్పష్టం చేయండి?
• కాంగ్రెస్‌ ప్రభుత్వానికి వర్ని మండల రైతుల హెచ్చరిక

వర్ని, నవంబర్‌ 12: యాసంగి పంటల సాగు విషయంలో ప్రభుత్వం మొద్దు నిద్రలో ఉన్నదని నిజామాబాద్‌ జిల్లా వర్ని మండల రైతులు తీవ్ర ఆగ్రహం వ్యక్తంచేశారు. పంటల సాగు విషయంలో ప్రభుత్వం ఇప్పటికీ స్పష్టత ఇవ్వలేకపోతుందని మండిపడ్డారు. రేవంత్‌ సర్కార్‌ వెంటనే స్పష్టత ఇవ్వకపోతే ప్రత్యేక తెలంగాణ సాధన తరహాలో రైతు ఉద్యమం తప్పదని హెచ్చరించారు. నిజామాబాద్‌ జిల్లా వర్నిలోని రైతువేదికలో గురువారం రైతులు మీడియా సమావేశం నిర్వహించి సర్కార్‌ తీరుపై ఆగ్రహం వ్యక్తంచేశారు.

యాసంగి సాగు విషయంలో ప్రభు త్వం తమకు అండగా నిలబడాలి తప్పితే పొట్టగొట్టే పనులు చేయొద్దని సూచించారు. యాసంగి ప్రణాళిక ఏమిటో చెప్పకుండా పంటలు వేయొద్దని చెప్పడం ఏమిటని ప్రశ్నించారు. కాంగ్రెస్‌ పాలనలో నిజాంసాగర్‌ అనాథగా మారిందని ఆవేదన వ్యక్తంచేశారు. ఇక్కడి ప్రతి రైతుకు నిజాంసాగర్‌తో అనుబంధం ఉన్నదని, క్లిష్ట పరిస్థితుల్లోనూ రైతులను ఆదుకున్నదని గుర్తుచేశారు.