దళిత బహుజన మంత్రులకు అవమానం

• భారత్‌ సమ్మిట్‌ ఆహ్వాన పత్రికలో వివాదం
• మంత్రుల పేర్ల కింద ఎమ్మెల్యేలుగా ముద్రణ

హైదరాబాద్‌, నవంబర్‌ 12 (నమస్తే తెలంగాణ): రాష్ట్ర ప్రభుత్వం ప్రతిష్టాత్మకంగా నిర్వహిస్తున్న భారత్‌ సమ్మిట్‌లో ప్యానెల్‌ డిసషన్‌ కోసం ముద్రించిన ఆహ్వాన పత్రిక రాజకీయ వర్గాల్లో చర్చనీయాంశంగా మారింది. సొంత ప్రభుత్వ ఆధ్వర్యంలో జరుగుతున్న కార్యక్రమంలోనే దళిత, బీసీ సామాజిక వర్గానికి చెందిన ఇద్దరు మంత్రులకు తీవ్ర అవమానం జరిగింది. హోదాల ప్రస్తావనలో తేడాలు రావడం విమర్శలకు దారితీసింది.

ప్యానెల్‌ చర్చలో పాల్గొంటున్న ఇతర ప్రముఖులందరివీ వారి హోదాలు పేరొన్న నిర్వాహకులు, మంత్రులు వాకిటి శ్రీహరి, అడ్లూరి లక్ష్మణ్‌లను మాత్రం కేవలం ఎమ్మెల్యేలుగానే ముద్రించడం గమనార్హం. ప్యానెల్‌ డిస్కషన్‌లో పాల్గొనే వారందరి పేర్ల వద్ద వారి పేర్లను స్పష్టంగా పేర్కొన్నారు, కానీ వాకిటి శ్రీహరి, అడ్లూరి లక్ష్మణ్‌ల పేర్ల వద్ద మాత్రం మంత్రి హోదాను విస్మరించి, కేవలం శాసనసభ్యులుగా మాత్రమే ముద్రించారు.

సొంత ప్రభుత్వమే తమ హోదాకు తగిన గుర్తింపు ఇవ్వకపోవడాన్ని మంత్రులిద్దరూ తీవ్రంగా పరిగణిస్తున్నట్టు తెలిసింది. ఈ వ్యవహారం వెలుగులోకి రావడంతో ప్రభుత్వ, రాజకీయ వర్గాల్లో చర్చ మొదలైంది. ఆహ్వాన పత్రిక రూపకల్పనలో జరిగిన ఈ పొరపాటు నిర్వాహకుల నిర్లక్ష్యమా లేక ప్రొటోకాల్‌ విభాగం వైఫల్యమా అనే సందేహాలు వ్యక్తమవుతున్నాయి. ఈ తప్పిదంపై సదస్సు నిర్వాహకులు ఏ విధంగా స్పందిస్తారన్నది ఇప్పుడు ఆసక్తికరంగా మారింది.