28న ‘చలో రామ్‌లీలా మైదాన్‌’

• మాజీ మంత్రి వీ శ్రీనివాస్‌గౌడ్‌

హైదరాబాద్‌, నవంబర్‌ 12 (నమస్తేతెలంగాణ): దేశవ్యాప్తంగా 2027లో చేపట్టనున్న కులగణనలో ఓబీసీలను లెక్కించాలనే ప్రధాన డిమాండ్‌తో ఈ నెల 28న ఢిల్లీలో ‘చలో రామ్‌లీలా మైదాన్‌’ పేరిట నిరసన ప్రదర్శన నిర్వహించనున్నట్టు మాజీ మంత్రి, అఖిల భారత ఓబీసీ ప్రజాప్రతినిధుల ఫోరం జాతీయ కన్వీనర్‌ వీ శ్రీనివాస్‌గౌడ్‌ వెల్లడించారు.

గురువారం న్యూఢిల్లీలోని కాన్‌స్టిట్యూషన్‌ క్లబ్‌లో ఆలిండియా ఓబీసీ కో ఆర్డినేషన్‌ కమిటీ ఆధ్వర్యంలో నిర్వహించిన సన్నాహక సమావేశంలో ఆయన పాల్గొని మాట్లాడారు. కులగణనలో ప్రతి కులానికి ప్రత్యేక కోడ్‌, డ్రాప్‌డౌన్‌ ఆప్షన్‌ కల్పించాలని కోరారు. ఓబీసీల జనాభా లెక్కలు లేకపోవడంతో విద్యా, ఉద్యోగాలు, చట్టసభల రిజర్వేషన్ల కేటాయింపులో తీరని నష్టం కలుగుతున్నదని చెప్పారు. 28న రామ్‌ లీలా మైదాన్‌ లో జరిగే నిరసన ప్రదర్శనలో బీసీ సంఘాలు పెద్ద సంఖ్యలో పాల్గొనాలని పిలుపునిచ్చారు.