జనవరి 25 నుంచి జనగణన

• రాష్ట్ర ప్రభుత్వం నోటిఫికేషన్‌
• జనవరి 10 నుంచి 24 వరకు ప్రజల స్వీయ గణనకు అవకాశం
• రిఫరెన్స్‌ తేదీగా మార్చి 1 అర్ధరాత్రి

హైదరాబాద్‌, నవంబర్‌ 9 (నమస్తే తెలంగాణ): దేశవ్యాప్తంగా 2027 జనాభా గణన (సెన్సస్‌) నిర్వహణకు కేంద్ర ప్రభుత్వం తేదీలను ఖరారు చేసింది. 2027 జనవరి 25 నుంచి ఫిబ్రవరి 28 వరకు జనాభా లెకల సేకరణ చేపట్టనున్నట్టు ప్రకటించింది. జనవరి 10 నుంచి 24 వరకు ప్రజలకు స్వీయ గణన (సెల్ఫ్‌ ఎన్యుమరేషన్‌) చేసుకొనే అవకాశం కల్పించింది. జనాభా గణన పూర్తయిన అనంతరం మార్చి 1 నుంచి 5 వరకు పునఃపరిశీలన ప్రక్రియ చేపట్టనున్నారు.

ఈ మేరకు కేంద్ర హోంశాఖ పరిధిలోని భారత రిజిస్ట్రార్‌ జనరల్‌, జనగణన కమిషనర్‌ జారీచేసిన నోటిఫికేషన్‌ను తెలంగాణ రాష్ట్ర గెజిట్‌లో పునఃప్రచురించాలని రాష్ట్ర ప్రభుత్వం సోమవారం ఉత్తర్వులు జారీ చేసింది. సాధారణ పరిపాలనాశాఖ నవంబర్‌ 10న తెలంగాణ అసాధారణ గెజిట్‌లో నోటిఫికేషన్‌ ప్రచురించాలని ఆదేశించింది. జనాభా గణనలో భాగంగా ఇంటింటి సర్వే ప్రారంభానికి ముందే 2027 జనవరి 10 నుంచి 24 వరకు ప్రజలు తమ వివరాలను స్వయంగా నమోదు చేసుకునేందుకు అవకాశం కల్పించారు. అనంతరం జనవరి 25 నుంచి ఫిబ్రవరి 28 వరకు జనాభా లెకల సేకరణ చేపడుతారు. జనాభా గణనకు సంబంధించి రిఫరెన్స్‌ తేదీగా మార్చి 1వ తేదీ అర్ధరాత్రి 12 గంటలను (00:00 గంటలు) నిర్ణయించారు. జనగణన వివరాల సేకరణలో ఈ తేదీని ప్రామాణికంగా తీసుకోనున్నారు.

కొన్ని రాష్ట్రాలకు మినహాయింపు

కేంద్రం జారీ చేసిన నోటిఫికేషన్‌ ప్రకారం మణిపూర్‌ (తదుపరి ప్రకటన వెలువడే వరకు), గోవా, ఉత్తరప్రదేశ్‌, పంజాబ్‌, ఉత్తరాఖండ్‌, లడఖ్‌ కేంద్రపాలిత ప్రాంతంతోపాటు హిమాచల్‌ప్రదేశ్‌, జమ్ముకశ్మీర్‌లోని మంచు ప్రభావిత ప్రాంతాలకు ఈ షెడ్యూల్‌ నుంచి మినహాయింపు ఇచ్చారు.

మిగిలిన రాష్ట్రాలు, కేంద్రపాలిత ప్రాంతాల్లో ప్రకటించిన తేదీల ప్రకారం జనాభా గణన నిర్వహించనున్నారు. తెలంగాణలో జనగణన ప్రక్రియకు సంబంధించి అవసరమైన ఏర్పాట్లు చేపట్టాలని కలెక్టర్లు, ప్రధాన జనగణన అధికారులు, సంబంధిత శాఖల అధిపతులకు రాష్ట్ర ప్రభుత్వ ప్రధాన కార్యదర్శి సంజయ్‌ జాజు ఆదేశాలు జారీచేశారు.