ఏపీ ఎమ్మెల్యేకు తెలుగు వర్సిటీ పురస్కారానికి సర్కార్‌ బ్రేక్‌

హైదరాబాద్‌, నవంబర్‌ 9 (నమస్తే తెలంగాణ) : తెలుగు వర్సిటీ విశిష్ట పురస్కారం ఎంపికకు రాష్ట్ర ప్రభుత్వం బ్రేకులు వేసింది. వర్సిటీ ప్రతిపాదనలను తిరస్కరించినట్టు సమాచారం. ఏపీకి చెందిన టీడీపీ ఎమ్మెల్యేను ఈ పురస్కారానికి వర్సిటీ ఎంపికచేసిన విషయం తెలిసిందే. ఇదే విషయాన్ని ‘నమస్తే తెలంగాణ’ ఇటీవలే వెలుగులోకి తీసుకొచ్చింది. తెలంగాణ వాదులు కూడా వర్సిటీ ప్రతిపాదనలపై అభ్యంతరాలు వ్యక్తంచేశారు.

సింగరేణి స్టేజ్‌ -2 విద్యుత్తు కొనుగోలుకు ఈఆర్సీ గ్రీన్‌సిగ్నల్‌

హైదరాబాద్‌, నవంబర్‌ 9 (నమస్తే తెలంగాణ): సింగరేణి సంస్థ నిర్మిస్తున్న 800 మోగావాట్ల థర్మల్‌ప్లాంట్‌ నుంచి విద్యుత్తు కొనుగోలుకు ఈఆర్సీ అనుమతినిచ్చింది. స్టేజ్‌ -2 పవర్‌ప్లాంట్‌ నుంచి 25 ఏండ్ల పాటు విద్యుత్తు కొనుగోలుకు ఓకే చెప్పింది. రూ.9,595.99 కోట్ల మూలధన వ్యయంగా సింగరేణి డీపీఆర్‌లో పేర్కొనగా ప్రతిపాదిత టారిఫ్‌లు తుది ఆమోదం కాదని.. అన్ని అంశాలను పరిగణనలోకి తీసుకుని ఖరారుచేస్తామని ఈఆర్సీ పేర్కొన్నది. తుది పీపీఏను 60 రోజుల్లో సమర్పించాలని ఆదేశించింది.

15న నల్లగొండలో ఏఐకేఎస్‌ బహిరంగ సభ

హైదరాబాద్‌, నవంబర్‌ 9 (నమస్తే తెలంగాణ): నల్లగొండలోని ఎన్జీ కళాశాల ప్రాంగణంలో ఈ నెల 15 నుంచి 18 వరకు అఖిల భారత కిసాన్‌ సభ 36వ మహాసభలను నిర్వహించనున్నట్టు ఆహ్వాన కమిటీ చైర్మన్‌, మాజీ ఎమ్మెల్యే జూలకంటి రంగారెడ్డి, రైతు సంఘం రాష్ట్ర ప్రధాన కార్యదర్శి టీ సాగర్‌ వెల్లడించారు. సోమవారం సీపీఎం రాష్ట్ర కార్యాలయంలో పోస్టర్‌ను ఆవిషరించారు. 15న సభకు మాజీ ఎంపీ బృందాకరత్‌, ఏఐకేఎస్‌ అధ్యక్షుడు అశోక్‌ దావలే, ప్రధాన కార్యదర్శి విజూకృష్ణన్‌ హాజరవుతారని తెలిపారు.