స్వీపర్లుగా నియమితులై.. కోట్లకు పడగలెత్తి..

• యూపీలో బయటపడిన భారీ కుంభకోణం

లక్నో: బీజేపీ పాలిత ఉత్తరప్రదేశ్‌లో పారిశుద్ధ్య కార్మికులుగా ప్రభుత్వ ఉద్యోగాలు చేస్తున్న కొందరు ఏకంగా కోటీశ్వరులుగా మారిపొయారు. నెలకు రూ.42 వేల జీతం తీసుకుంటున్న వీరిలో కొందరికి కల్యాణ మండపాలు, సిమెంట్‌ ఏజెన్సీలు, షాపింగ్‌ కాంప్లెక్స్‌లు, మరికొందరికి పెట్రోల్‌ బంకులు సైతం ఉన్నాయి. అయితే వీరు గ్రామాల్లో పారిశుద్ధ్య పనులు చేయడం లేదు. రోజుకు రూ. 300 నుంచి 500 కూలీ ఇచ్చి ఇతరులతో పనిచేయిస్తున్నారు.

ఈ వ్యవహారం ‘దైనిక్‌ భాస్కర్‌’ నిర్వహించిన పరిశోధనలో వెలుగు చూసింది. ఉత్తరప్రదేశ్‌లోని లఖింపూర్‌ జిల్లాలో ఈ భారీ అక్రమ వ్యవస్థ బయటపడింది. రాష్ట్రంలో సుమారు 94 వేల మంది పారిశుద్ధ్య కార్మికులు పనిచేస్తున్నారు. వీరిలో కొందరు గ్రామ పెద్దలు, పంచాయతీ కార్యదర్శులతో కుమ్మక్కై విధులకు హాజరుకాకుండానే జీతాలు పొందుతున్నట్లు తేలింది. 2008 తర్వాత ఉద్యోగాల్లో చేరిన కొందరు అఖిలేశ్‌ యాదవ్‌ ప్రభుత్వ హయాంలో పర్మినెంట్‌ అయిన తర్వాత వ్యాపారాలు ప్రారంభించారు.