‘మాతృభాష’కు పాలసీ రూపొందించాలి : యునెస్కో

హైదరాబాద్‌, నవంబర్‌ 13 (నమస్తే తెలంగాణ) : మాతృభాష ఆధారిత బహుభాషా విద్యాబోధనకు ప్రత్యేకంగా రాష్ట్రస్థాయిలో పాలసీ అవసరమని యునెస్కో సూచించింది. విద్యార్థుల అభ్యసనలో మాతృభాష పాత్ర అత్యంత కీలకమని అభిప్రాయపడింది. స్టేట్‌ ఆఫ్‌ ది ఎడ్యుకేషన్‌ రిపోర్ట్‌ ఇండియా-2025 (భాషా మ్యాటర్స్‌ ) పేరిట యునెస్కో ఓ నివేదికను రూపొందించింది.

ఈ నివేదికను పాఠశాల విద్యాశాఖ డైరెక్టర్‌ నవీన్‌ నికోలస్‌ శుక్రవారం విడుదల చేశారు. పిల్లలు తమకు పరిచయమైన మాతృభాషలో చదివినప్పుడే భావనను సులభంగా అర్థం చేసుకోగలరని.. జ్ఞాపకశక్తి, సృజనాత్మక, ఆలోచనా శక్తి పెరుగుతాయని యునెస్కో స్పష్టం చేసింది.

బాలల రచనలు ప్రచురించాలి : ఆర్‌యూపీపీటీఎస్‌

హైదరాబాద్‌, నవంబర్‌ 13 (నమస్తే తెలంగాణ) : బాలల రచనలను ప్రభుత్వం ప్రోత్సహించి ప్రచురించాలని రాష్ట్రీయ ఉపాధ్యాయ పండిత పరిషత్తు (ఆర్‌యూపీపీ) తెలంగాణ ప్రభుత్వాన్ని కోరింది. బాలల సాహిత్యాన్ని ప్రచురించడం ద్వారా వారిలోని సృజనాత్మకతను వెలికితీసినట్లు అవుతుందని సంఘం రాష్ట్ర అధ్యక్ష, ప్రధాన కార్యదర్శులు అబ్దుల్లా, గుళ్లపల్లి తిరుమల కాంతికృష్ణ అభిప్రాయపడ్డారు. బాలల దినోత్సవం సందర్భంగా తెలంగాణ సాహిత్య అకాడమీ, తెలంగాణ సారస్వత పరిషత్తు, బాల చెలిమి వంటి సంస్థలు వివిధ పోటీలను నిర్వహించగా, ఆయా పోటీల్లో పాల్గొన్న వారిని వారు అభినందించారు.