సాకివాగులో ఘనంగా జన జాతీయ గౌరవ దివస్ వేడుకలు

– గిరిజన సంస్కృతితో అలరించిన కళాకారులు

ములకలపల్లి, నవంబర్ 09 : ధర్తి ఆబా భగవాన్ బిర్సా ముండా 151వ జయంతిని పురస్కరించుకుని రాచన్నగూడెం గ్రామ పంచాయతీ పరిధిలోని సాకివాగు గ్రామంలో 15 రోజులపాటు నిర్వహిస్తున్న జన జాతీయ గౌరవ దివస్ వేడుకలు సోమ‌వారం ఘనంగా జరిగాయి. తెలంగాణ ప్రభుత్వ గిరిజన సంక్షేమ శాఖ, సమీకృత గిరిజనాభివృద్ధి సంస్థ (ఐటీడీఏ) భద్రాచలం ఆధ్వర్యంలో నిర్వహించిన ఈ వేడుకల్లో గ్రామ ప్రజలు, చిన్నారులు, మహిళలు పెద్ద సంఖ్యలో పాల్గొన్నారు. డోలు వాయిద్యాలు, గిరిజన సంప్రదాయ నృత్యాలతో గ్రామమంతా పండుగ వాతావరణం నెలకొంది. ఈ కార్యక్రమానికి రాచన్నగూడెం సర్పంచ్ మడకం విజయ, మూకమామిడి సర్పంచ్ కోర్సా ఆదిలక్ష్మి ముఖ్య అతిథులుగా హాజరయ్యారు.

ఈ సందర్భంగా వారు మాట్లాడుతూ.. గిరిజన హక్కులు, ఆత్మగౌరవం కోసం బిర్సా ముండా తన ప్రాణాలను సైతం లెక్కచేయకుండా పోరాడారని అన్నారు. ఆయన ఆశయాలను భావితరాలకు తెలియజేయాలనే ఉద్దేశంతోనే 15 రోజులపాటు ఈ వేడుకలు నిర్వహిస్తున్నట్లు తెలిపారు. గిరిజన సంస్కృతి, సంప్రదాయాలు, ఆచారాలను కాపాడుకోవడం ప్రతి ఒక్కరి బాధ్యత అని పేర్కొన్నారు. అనంతరం సర్పంచులు కళాకారులతో కలిసి చేసిన గిరిజన సంప్రదాయ నృత్యాలు ప్రత్యేక ఆకర్షణగా నిలిచాయి. కళాకారుల ప్రదర్శనలు, సంప్రదాయ వాయిద్యాలు ప్రేక్షకులను అలరించాయి. ఈ కార్యక్రమంలో ఉప సర్పంచ్ వగ్గెల వెంకటేష్, పంచాయతీ కార్యదర్శి బిట్ట వెంకటేశ్వర్లు, గ్రామ పెద్దలు పద్దం లక్ష్మణరావు, మడివి సోనయ్య, మడకం రవి, కోవాడి రాజు, మహిళలు, యువకులు, అంగన్‌వాడీ, ఆశా కార్యకర్తలు పాల్గొన్నారు.