లబ్ధిదారులకు ఇళ్ల మంజూరు పత్రాలు, కల్యాణలక్ష్మి చెక్కులు పంపిణీ

బూర్గంపహాడ్, నవంబర్ 09 : మండల కేంద్రమైన బూర్గంపహాడ్ రైతు వేదికలో టేకులచెరువు పంచాయతీకి చెందిన లబ్ధిదారులకు ఇళ్ల మంజూరు పత్రాలు, కల్యాణలక్ష్మి చెక్కులను ఎమ్మెల్యే పాయం వెంకటేశ్వర్లు సోమవారం పంపిణీ చేశారు. ఈ సందర్భంగా ఆయన మాట్లాడుతూ.. ప్రభుత్వం అర్హులైన నిరుపేద కుటుంబాలకు సొంతింటి కల సాకారం చేసేందుకు ఇందిరమ్మ ఇళ్ల పథకాన్ని అమలు చేస్తుందని, సొంత ఇల్లులేని నిరుపేద కుటుంబాలను గుర్తించి ఇళ్ల పత్రాలను మంజూరు చేస్తూ ప్రభుత్వం అండగా నిలుస్తుందన్నారు. ఆడబిడ్డల వివాహాలకు ఆర్ధిక భరోసా కల్పించేందుకు కల్యాణలక్ష్మి పథకం ద్వారా ఆర్ధికసాయం అందిస్తుందని, నిరుపేదల సంక్షేమం కోసం ప్రభుత్వం అమలు చేస్తున్న పథకాలను ప్రతిఒక్కరూ సద్వినియోగం చేసుకోవాలన్నారు. ఈ కార్యక్రమంలో ఎంపీడీవో జమలారెడ్డి, తాసీల్దార్ కేఆర్కే ప్రసాద్, హౌసింగ్ ఏఈ ఉదయ్ కిరణ్, మండల అధ్యక్షుడు పూలపెల్లి సుధాకర్‌రెడ్డి, భజన ప్రసాద్, సర్పంచ్, ఉప సర్పంచులు మందా నాగరాజు, గుండె వెంకన్న, వారాల వేణు, ఆయా పంచాయతీల సర్పంచ్, ఉప సర్పంచులు, నాయకులు పాల్గొన్నారు.