శరద్‌ పవార్‌ పార్టీలో తిరుగుబాటు!

• ఎన్డీయేలో ఎన్సీపీ వర్గాల విలీన అవకాశం!

ముంబై: నేషనలిస్ట్‌ కాంగ్రెస్‌ పార్టీ(ఎన్సీపీ)లోని రెండు వర్గాలు బీజేపీతో జత కట్టాలని ఉమ్మడిగా ఆలోచిస్తున్న వేళ పార్టీ వ్యవస్థాపకుడు శరద్‌ పవార్‌, సామ్యవాద భావాలను అనుసరించే తన ముని మేనల్లుడు రోహిత్‌ పవార్‌, మరికొందరు నాయకుల నుంచి తిరుగుబాటు ముప్పు ఎదుర్కొంటున్నారు. రెండు ఎన్సీపీ వర్గాల విలీనంపై శరద్‌ పవార్‌ వర్గంలో విభేదాలు వ్యక్తమయ్యాయి. పలువురు నాయకులు పార్టీ పునరేకీకరణకు అనుకూలంగా ఉన్నప్పటికీ, మహారాష్ట్రలోనూ, కేంద్రంలోనూ ప్రభుత్వంలో చేరడాన్ని వ్యతిరేకిస్తున్నారు.

రోహిత్‌ పవార్‌, మరికొందరు నాయకులు బీజేపీ నేతృత్వంలోని ఎన్డీయేలో భాగమయ్యే ప్రతిపాదన పట్ల విముఖత చూపుతున్నారు. రెండు వర్గాల విలీనాన్ని బీజేపీ పొత్తుతో ముడి పెట్టకూడదని వారు వాదిస్తున్నారు. బీజేపీ కూటమిలో భాగం కావడం కంటే ప్రత్యామ్నాయ రాజకీయ మార్గాన్ని అన్వేషించడానికే తాము మొగ్గు చూపుతున్నామని వారు స్పష్టం చేసినట్టు సమాచారం. శరద్‌ పవార్‌ బీజేపీతో పొత్తు పెట్టుకొంటే, కాంగ్రెస్‌లో చేరాలని రోహిత్‌ పవార్‌ నిర్ణయించుకున్నట్లు సమాచారం.