విద్యతోనే సమాజాభివృద్ధి సాధ్యం : కలెక్టర్ రాహుల్ శర్మ

మహాదేవపూర్ (భూపాలపల్లి), నవంబర్ 11 : విద్య ద్వారానే వ్యక్తిగత వికాసంతో పాటు సమాజం, దేశాభివృద్ధి సాధ్యమని జ‌య‌శంక‌ర్ భూపాల‌ప‌ల్లి జిల్లా కలెక్టర్ రాహుల్ శర్మ అన్నారు. మౌలానా అబుల్ కలాం ఆజాద్ 138వ జయంతి సందర్భంగా బుధవారం ఐడీఓసీ సమావేశ మందిరంలో మైనారిటీ సంక్షేమ శాఖ ఆధ్వర్యంలో జాతీయ విద్యా దినోత్సవం, మైనారిటీ సంక్షేమ దినోత్సవ వేడుకలు నిర్వహించారు. ఈ సందర్భంగా ఆజాద్ చిత్రపటానికి పూలమాల వేసి నివాళులర్పించారు.

మౌలానా ఆజాద్ విద్యాభివృద్ధికి, జాతీయ సమగ్రతకు, మతసామరస్యానికి చేసిన సేవలు చిరస్మరణీయమని కలెక్టర్ కొనియాడారు. ప్రభుత్వం అమలు చేస్తున్న మైనారిటీ సంక్షేమ పథకాలపై ప్రజలకు అవగాహన కల్పించాలని అధికారులకు సూచించారు. విద్యార్థులు క్రమశిక్షణ, పట్టుదలతో చదివి ఉన్నత లక్ష్యాలను సాధించాలని పిలుపునిచ్చారు. కార్యక్రమంలో మైనారిటీ సంక్షేమ అధికారి డాక్టర్ కుమారస్వామి, అధికారులు, మైనారిటీ నాయకులు పాల్గొన్నారు.