కారేపల్లి మండల అభివృద్ధి పనులపై సమీక్షించిన ప్రత్యేక అధికారి ఆలేటి ప్రమీల

కారేపల్లి (సింగరేణి), నవంబర్ 11: ఖ‌మ్మం జిల్లా కారేపల్లి మండల స్థాయి సమీక్ష సమావేశం స్థానిక మండల ప్రజాపరిషత్ కార్యాలయ సమావేశ మందిరంలో బుధవారం మండల ప్రత్యేక అధికారి ఆలేటి ప్రమీల అధ్యక్షతన నిర్వహించారు. ఈ సమావేశంలో తహసీల్దార్ ఓరుగంటి వెంకటేశ్వర్లు, ఎంపీడీవో బానోతు పద్మతో పాటు మండలంలోని వివిధ గ్రామాల సర్పంచులు పాల్గొన్నారు.

ఈ సందర్భంగా వివిధ శాఖలకు చెందిన అధికారులు తమ తమ శాఖల పరిధిలో చేపడుతున్న అభివృద్ధి పనులు, ప్రభుత్వ సంక్షేమ పథకాల అమలు, ఇప్పటివరకు సాధించిన ప్రగతికి సంబంధించిన నివేదికలను సమావేశంలో చదివి వినిపించారు. ఆయా శాఖల వారీగా పనుల పురోగతిని సమీక్షిస్తూ, ప్రజలకు ప్రభుత్వ పథకాలు సమర్థవంతంగా అందేలా సమన్వయంతో పనిచేయాలని సమావేశంలో చర్చించారు. గ్రామాల్లో నెలకొన్న సమస్యలు, అభివృద్ధి పనుల అమలుపై కూడా సమీక్షించారు.