అల్వాల్‌ ఆస్పత్రి నిర్మాణంలో సర్కార్‌ నిర్లక్ష్యం

• 23 నెలల్లో 5 శాతం పనులేనా?

• వైద్యశాల సందర్శనలో బీఆర్‌ఎస్‌ సోషల్‌ మీడియా కన్వీనర్‌ క్రిశాంక్‌ ఆగ్రహం

కంటోన్మెంట్‌, నవంబర్‌ 11: సీఎం కేసీఆర్‌ బీఆర్‌ఎస్‌ ప్రభుత్వ హయాంలో ప్రజలకు నాణ్యమైన వైద్య సేవలు అందించే లక్ష్యంతో నగరం నాలుగు దిక్కుల్లో ప్రారంభించిన ప్రభుత్వ ఆస్పత్రుల నిర్మాణంపై రేవంత్‌రెడ్డి కాంగ్రెస్‌ ప్రభుత్వం తీవ్ర నిర్లక్ష్యాన్ని ప్రదర్శిస్తున్నదని బీఆర్‌ఎస్‌ సోషల్‌ మీడియా కన్వీనర్‌ మన్నె క్రిశాంక్‌ ఆగ్రహం వ్యక్తం చేశారు. బుధవారం కంటోన్మెంట్‌ బొల్లారంలోని అల్వాల్‌ టిమ్స్‌ ఆస్పత్రిని రాష్ట్ర బేవరేజెస్‌ కార్పొరేషన్‌ మాజీ చైర్మన్‌ గజ్జెల నాగేశ్‌, నియోజకవర్గం కంటెస్టెడ్‌ ఎమ్మెల్యే నివేదిత సాయన్న, కంటోన్మెంట్‌ బోర్డు మాజీ సభ్యులు అనిత ప్రభాకర్‌, నళిని కిరణ్‌, శ్యామ్‌కుమార్‌, లోక్‌నాథ్‌, బోయిన్‌పల్లి మార్కెట్‌ మాజీ చైర్మన్‌ టీఎన్‌. శ్రీనివాస్‌ పార్టీ నాయకులు కార్యకర్తలతో కలిసి సందర్శించారు.

ఈ సందర్భంగా క్రిశాంక్‌ మీడియాతో మాట్లాడుతూ నగరంలోని గాంధీ, ఉస్మానియా ఆస్పత్రులపై పెరుగుతున్న రోగుల ఒత్తిడిని తగ్గించి జంట నగరాల ప్రజలకు నాణ్యమైన ప్రభుత్వ వైద్య సేవలు అందించేందుకు కేసీఆర్‌ బీఆర్‌ఎస్‌ ప్రభుత్వ హయాంలో అల్వాల్‌, సనత్‌నగర్‌, ఎల్బీనగర్‌, వరంగల్‌ సూపర్‌ స్పెషాలిటీ ఆస్పత్రి వెయ్యిపడకల ఆస్పత్రి నిర్మాణం చేపట్టారన్నారు. అయితే రేవంత్‌రెడ్డి కాంగ్రెస్‌ ప్రభుత్వం ప్రభుత్వ ఆస్పత్రుల నిర్మాణాలను పూర్తి చేయడంలో నిర్లక్ష్యం వహిస్తూ మెడికవర్‌ వంటి కార్పొరేట్‌ ఆసుపత్రుల ప్రారంభోత్సవాలకు ముఖ్యమంత్రి, మంత్రివర్గ సభ్యులు హెలికాప్టర్‌లో వెళ్లి ప్రచారం చేసుకుంటున్నారని విమర్శించారు.

పొంతనలేని ప్రకటనలు

2025 జనవరిలో రోడ్లు భవనాల శాఖ మంత్రి కోమటిరెడ్డి వెంకటరెడ్డి టిమ్స్‌ అల్వాల్‌ ఆస్పత్రిని సందర్శించి 90 శాతం పనులు పూర్తయ్యాయని, ఆగస్ట్టులో ప్రారంభిస్తామని ప్రకటించారని..కానీ మంగళవారం మంత్రి దామోదర రాజనరసింహ ఆసుపత్రి నిర్మాణ పనులు 95 శాతం పూర్తయ్యాయంటూ..జనవరి 2027లో ప్రారంభిస్తామని ప్రకటించారని.. 23 నెలల్లో కేవలం 5 శాతం పనులు మాత్రమే పూర్తయ్యాయా అని ప్రశ్నించారు. కేసీఆర్‌ ప్రభుత్వం నిర్మించిన ప్రాజెక్టులకు పేరు వస్తుందని..

ఉద్దేశపూర్వకంగా ఆలస్యం చేస్తున్నారనే అనుమానాలు ప్రజల్లో వ్యక్తమవుతున్నాయన్నారు. గజ్జెల నాగేశ్‌, నివేదిత సాయన్న మాట్లాడుతూ.. అల్వాల టిమ్స్‌ ఆసుపత్రిని మంత్రులు సందర్శించి పొంతన లేకుండా ప్రారంభ తేదీలు ప్రకటించకుండా నిర్మాణ పనుల్లో జాప్యానికి గల కారణాలను కాంగ్రెస్‌ ప్రభుత్వం ప్రజలకు వివరించడంతో పాటు ఆస్పత్రి ప్రారంభానికి కచ్చితమైన తేదీని ప్రకటించాలని డిమాండ్‌ చేశారు. బీఆర్‌ఎస్‌ హయాంలో 90 శాతం పనులు పూర్తి కాగా కాంగ్రెస్‌ ప్రభుత్వం కేవలం 5 శాతం పనులు పూర్తి చేయడం దారుణమన్నారు. వెంటనే మిగిలిన పనులు పూర్తిచేయాలన్నారు.