రుద్రంపూర్‌కు పిన్‌కోడ్‌ సమస్య

21 November 2026 - 21:09
0 0
రుద్రంపూర్‌కు పిన్‌కోడ్‌ సమస్య
రుద్రంపూర్‌కు పిన్‌కోడ్‌ సమస్య

– స్మార్ట్ రేషన్ కార్డుల్లో 507118తో ప్రజలకు ఇక్కట్లు
– ఆధార్, బ్యాంకు ఖాతాలు, ఉద్యోగ దరఖాస్తుల్లోనూ తప్పని అవస్థలు
– పోర్టల్‌లో పిన్‌కోడ్‌ సరిచేయాలని డిమాండ్

రుద్రంపూర్, నవంబర్ 21 : తెలంగాణ ప్రభుత్వం పంపిణీ చేస్తున్న స్మార్ట్ రేషన్ కార్డుల్లో తప్పుగా నమోదవుతున్నాయి. పోస్టల్ పిన్‌కోడ్‌ స్థానిక ప్రజలకు కొత్త సమస్యలను తెచ్చిపెడుతోంది. చుంచుపల్లి మండలం రుద్రంపూర్ గ్రామ పంచాయతీకి సంబంధించిన అసలు పోస్టల్ పిన్‌కోడ్‌ 507119 కాగా, ప్రస్తుతం ప్రభుత్వం పంపిణీ చేస్తున్న స్మార్ట్ రేషన్ కార్డుల్లో 507118గా ముద్రించి ఉండడంతో ప్రజలు ఆందోళన వ్యక్తం చేస్తున్నారు. ఈ తప్పిదం భవిష్యత్‌లో వివిధ ప్రభుత్వ, ప్రైవేటు సేవలు పొందే సమయంలో ఇబ్బందులకు దారితీసే ప్రమాదం ఉందని రుద్రంపూర్ ఉప సర్పంచ్ తోటరాజు ఆవేదన వ్యక్తం చేశారు. శనివారం రుద్రంపూర్ గ్రామ పంచాయతీ కార్యాలయంలో సర్పంచ్ బానోత్ కేస్లీ అధ్యక్షతన స్మార్ట్ రేషన్ కార్డుల పంపిణీ కార్యక్రమాన్ని గ్రామ సభ రూపంలో నిర్వహించారు.

ఈ సందర్భంగా ఉప సర్పంచ్ తోటరాజు మాట్లాడుతూ.. రుద్రంపూర్ పంచాయతీకి సంబంధించిన పోస్టల్ పిన్‌కోడ్‌ విషయంలో చాలా కాలంగా సమస్య కొనసాగుతోందని తెలిపారు. గ్రామానికి వాస్తవంగా 507119 పిన్‌కోడ్‌ ఉండగా, ప్రభుత్వ సంబంధిత పోర్టళ్లలో మాత్రం ఈ నంబర్ కనిపించకపోవడంతో వివిధ సందర్భాల్లో ప్రజలు ఇబ్బందులు ఎదుర్కొంటున్నారని పేర్కొన్నారు. ప్రజలు ఎన్నో ఏళ్లుగా ఎదుర్కొంటున్న ఈ సమస్యను అధికారులు ఇకనైనా గుర్తించి పరిష్కరించాలని డిమాండ్ చేశారు. అనంతరం సర్పంచ్ బానోత్ కేస్లీ చేతుల మీదుగా లబ్ధిదారులకు స్మార్ట్ రేషన్ కార్డులను పంపిణీ చేశారు. ఈ కార్యక్రమంలో గౌతంపూర్ సర్పంచ్ ఎస్. కళ్యాణి, ధన్‌బాద్ పంచాయతీ సర్పంచ్ గుగులోతు జ్యోతి, ఉపసర్పంచులు ప్రేమ్ కుమార్, గంగారాం, రుద్రంపూర్ పంచాయతీ కార్యదర్శి నరేందర్, జీపీఓ గోపాల్, వివిధ రాజకీయ పార్టీల నాయకులు, గ్రామస్థులు పాల్గొన్నారు.

రుద్రంపూర్‌కు పిన్‌కోడ్‌ సమస్య

రుద్రంపూర్‌కు పిన్‌కోడ్‌ సమస్య

Comments (0)

User