‘పూర్తిస్థాయి బోనస్‌ చెల్లించే వరకు ఆందోళన విరమించేది లేదు’

– రెండో రోజుకు చేరిన‌ వీకేసీఎం ఓబీ కాంట్రాక్ట్ కార్మికుల నిరసన
– సింగరేణి యాజమాన్యం తక్షణమే జోక్యం చేసుకోవాలి
– కాంట్రాక్ట్ కార్మిక సంఘాల జేఏసీ

రుద్రంపూర్, నవంబర్ 11: సింగరేణి కొత్తగూడెం ఏరియాలోని వీకేసీఎం కోల్ మైన్‌లో మట్టి వెలికితీత పనులు నిర్వహిస్తున్న సోదా కంపెనీ కాంట్రాక్ట్ కార్మికులకు పూర్తిస్థాయిలో 20 శాతం బోనస్‌ చెల్లించాలని, చట్టబద్ధ హక్కులు, సౌకర్యాలు కల్పించాలని, కార్మికులపై వేధింపులు నిలిపివేయాలని డిమాండ్ చేస్తూ కాంట్రాక్ట్ కార్మిక సంఘాల జేఏసీ ఆధ్వర్యంలో చేపట్టిన నిరసన దీక్ష బుధవారం రెండో రోజుకు చేరుకుంది. ఈ సందర్భంగా జేఏసీ నాయకులు మాట్లాడుతూ.. గత రెండు నెలలుగా బోనస్‌ చెల్లించాలని సోదా యాజమాన్యాన్ని కోరుతున్నప్పటికీ చర్చల పేరుతో కాలయాపన చేస్తోందని ఆరోపించారు. కార్మికులకు ఎలాంటి సమాచారం ఇవ్వకుండా మంగళవారం అతి తక్కువ మొత్తంలో బోనస్‌ను వారి ఖాతాల్లో జమ చేయడం తీవ్ర అసంతృప్తికి కారణమైందన్నారు. దీనికి నిరసనగా రెండో షిఫ్ట్‌ నుంచి కార్మికులు ఆందోళనకు దిగారని, బుధవారం కూడా నిరసన కొనసాగించారని తెలిపారు.

కార్మికులకు చట్టబద్ధంగా రావాల్సిన పూర్తి బోనస్‌ చెల్లించకుండా యాజమాన్యం జాప్యం చేయడం తగదన్నారు. పూర్తిస్థాయి 20 శాతం బోనస్‌ చెల్లించే వరకు కార్మికులు ఆందోళన విరమించే పరిస్థితి లేదని స్పష్టం చేశారు. ఈ సమస్యపై సింగరేణి యాజమాన్యం తక్షణమే స్పందించి సోదా కంపెనీ యాజమాన్యంతో చర్చించి కార్మికులకు న్యాయం చేయాలని కోరారు. లేనిపక్షంలో నిరసనను మరింత ఉధృతం చేసి నిరవధిక ఆందోళనకు దిగుతామని జేఏసీ నాయకులు హెచ్చరించారు. ఈ కార్యక్రమంలో ఏఐటీయూసీ కాంట్రాక్ట్ విభాగం కొత్తగూడెం రీజియన్ కార్యదర్శి జి.వీరస్వామి, ఐఎన్‌టీయూసీ రాష్ట్ర నాయకుడు జెట్టి మోహన్, ఐఎఫ్‌టీయూ రీజియన్ కార్యదర్శి ఎన్.సంజీవ్, సీఐటీయూ నాయకుడు నాగయ్య, బీఎంఎస్ నాయకుడు రఘు, టీబీజీకేఎస్ నాయకుడు హైమద్, డీడబ్ల్యూఎస్ నాయకుడు బాచి, హెచ్‌ఎంఎస్ నాయకుడు జలీల్, టీఎన్‌టీయూసీ నాయకుడు కోటి, సీకేహెచ్‌పీఎస్ నాయకుడు తోకల రామచందర్ పాల్గొన్నారు.